Pse Hillary Clinton hoqi dorë nga fundet dhe fustanet për të veshur pantallona përgjithmonë? Se nuk ka qenë kështu nga fillimi.

Në një intervistë për CBS, Hillary Clinton kujtoi një episod në jetën e saj si Zonjë e Parë që e bëri të merrte këtë vendim.

Në vitin 1995 Hillary Clinton ishte në Brazil për një udhëtim zyrtar: “Isha ulur në një divan dhe shtypi u lejua të hynte. Kishte shumë fotografë që bënin foto. Disa prej tyre kishin qëllime të këqija. Disa kohë më vonë, Shtëpia e Bardhë u njoftua për praninë e disa reklamave që më tregonin gjithsesi të ulur me këmbët bashkuar, ose kështu mendova unë. Por mënyra sesi ishte shitur e gjitha, ishte e ulët”, tha Hillary Clinton. Kështu Zonja e Parë në mënyrë të pavullnetshme ishte bërë imazh i një kompanie braziliane të të brendshmeve që përdorte fotot e Clinton nga udhëtimi i saj zyrtar. Dhe kjo për arsyen e thjeshtë se ajo kishte veshur një fund atë ditë.

Pas atij episodi të pakëndshëm, Hillary Clinton fitoi njëfarë përvoje. E dinte se do të shoqërohej gjithmonë nga fotografë kështu që e vendosi. S`do të vishte me funde dhe fustane.

“Do dilja në skenë, do ngjitesha tek shkallët… e dija që do të ishin pas meje dhe poshtë meje. Nuk mund të rrezikoja më, kështu që fillova të vesh pantallona”, tregon ajo.

E vetëdijshme për presionin e ushtruar ndaj grave në politikë, imazhi i të cilave i nënshtrohet një analize të vazhdueshme, Hillary Clinton shprehu së fundmi edhe mbështetjen e saj për Sanna Marin, kryeministren finlandeze e cila ka qenë objekt polemikash për videot teksa kërcente dhe pinte në një festë private.