Në konferencën e përjavshme për mediat, kryetari i PD-së, Sali Berisha dënoi tenderat në fushën dixhitale, duke i cilësuar korruptive. Teksa foli për sulmet kibernetike, Berisha tha se është shpenzuar një shumë e madhe parash, por mbrojtja e sisitemeve mbetet e dobët.

“Dënoj me forcën më të madhe, tenderat korruptivë të ndërtimit dhe mbrojtjes së këtyre sistemeve. Përpjekjet për të ndërhyrë në Kosovë kanë qenë të mëdha, por mbrojtja e tyre ka shkëlqyer dhe nuk ka lejuar penetrimin në këto sisteme.

200 milionë euro të shpenzuara në Shqipëri kanë përfunduar në xhepat e Gjelishtëve, Beqëve dhe baxhanakëve me shokë dhe nuk kanë përfunduar në teknologjitë mbrojtëse. Përpjekjet për të fajësuar kompaninë amerikane, janë përpjekje për të fshehur vjedhjet që janë bërë”, tha Berisha.

Ky i fundit i bëri thirrje NATO-s, që të ndihmojnë Shqipërinë për të kapërcyer këtë agresion, duke shqyrtuar të gjithë situatën e sistemeve dixhitale në Shqipëri.

“Në këtë kontekst, i bëj thirrje NATO-s, SHBA, me një ekip të gjithanshëm, të ndihmojnë Shqipërinë për të kapërcyer këtë agresion, duke shqyrtuar të gjithë situatën e sistemeve dixhitale në Shqipëri.

Mbrojtjen kibernetike, Rama e shkatërroi sa erdhi në pushtet. Ishte një njësi që paguhej vetëm për mbrojtjen kibernetike të sistemit.

E shkriu duke i quajtur spiunë dixhitalë dhe i largoi. Thirrja ime për partnerët tanë është një ndërhyrje emergjente, sepse Irani nuk mund dhe nuk duhet ta fitojë këtë betejë. Nuk mund të intimidojë Shqipërinë për të ndryshuar qëndrimin e saj ndaj opozitës iraniane, që lufton për lirinë dhe dinjitetin e Iranit”, shtoi kryedemokrati.