Nga tenderat e KESH dhe konfiskimi i ndërtimeve, tek Ervis Martinaj, çfarë tha Berisha në mbledhjen e grupit parlamentar ?!

KESH ka investime të regjistruara 1 miliard euro, ndërsa punimet nuk kapin as vlerën e 100 milionë eurove.

Ajo që po ndodh në Shqipëri, është shpërbërja e plotë e shtetit ligjor. Kështu deklaroi kryetari i PD-së, Sali Berisha në mbledhjen e grupit parlamentar. Ai u ndal te sulmi kibernetik dhe te rrjedhja e të dhënave.

Duke theksuar se çdo e dhënë tashmë është e aksesueshme, Berisha u shpreh se sot në pikat kufitare çdokush hyn dhe del pa problem.

“Në zhvillimet e fundit në vend, gjithçka dhe çdo sekret, çdo e dhënë e fshehtë, që ka ekzistuar në arkivën e vendit tonë për banda dhe kriminelë, sot është në treg. Kjo përbën një zhvillim në pamje të parë shumë tronditës. Por kur mendohesh, dhe arsyeton, konstaton se banditët më të mëdhenj të këtij vendi, shefat e bandave të vendit, janë në parlament, janë në qeveri, janë në institucione, atëherë është e kotë të dramatizosh një diçka që në një vend normal është me të vërtetë dramatike.

Sot, në pikat kufitare qarkullojnë lirshëm të kërkuar dhe të pakërkuar, pasi sistemet nuk funksionojnë. Por përsëri, sot, ortakët e tyre, hyjnë në parlament, hyjnë në qeveri, hyjnë në institucione. Po të krahasosh se pasuritë e krijuara nga ata, me akte malavite, krahasuar me ministrat dhe kryeministrat me firma e dokumente zyrtare, ato janë thërrime”, deklaroi Berisha.

Ky i fundit u ndal edhe te VKM-ja për konfiskimin e ndërtimeve pa leje. Ai tha se kjo është një shkelje flagrante e ligjit.

“Nëse ndalemi në vendimin e qeverisë, të ashtuquajtur qeveri, për pallate dhe shtesat pa leje, ai është një akt i pashembullt, ku me ligj qeverie, merren në mënyrë flagrante, funksionet e parlamentit, me vendim qeverie pushohen çeshtje gjyqësore, me vendim qeverie, bllokohet sistemi i drejtësisë, me vendim qeverie, vendoset një standard i tmerrshëm në vend”, shtoi kryedemokrati.

Duke folur për krizën energjitike, Berisha deklaroi se KESH ka investime të regjistruara 1 miliard euro, ndërsa shtoi se punimet nuk kapin as vlerën e 100 milionë eurove.

“100 milionë euro tendera në KESH së fundmi. Se KESH e kanë si pusin ku mbushin paratë.  KESH ka investime të regjistruara 1 miliard euro. Punime të kryera nuk janë as 100 milionë. Pra, në këtë situatë, sirenat e revoltës popullore po bien në katër anët e vendit”, tha më tej ai.

Kryedemokrati këmbëngul se kryeministri Rama është në dijeni të vendodhjes së Ervis Martinajt. Ky i fundit, i shumëkërkuari i policisë rezulton i zhdukur prej afro një muaji.

“Nuk ka sektor që ky nuk ka shtrirë tentakulat e veta. Ia morën lojërat e fatit Ervis Martinit dhe tani thotë ku është. E di vetë ai ku është. Ai ishte biznesmen i lojërave të fatit. Olsi Rama është përfolur si njeriu në hije i lojërave të fatit.

Shko e pyet Baton Stanishiçin dhe Ymer Çorapen se ata e dinë. A nuk shkruajtën ata se është në gjashtë copa në prokurori. Një njeri i zhdukur dhe një shtet bandit që thotë se është në gjashtë copa në prokurori”, shtoi Berisha.

Ky i fundit foli për aksionin e opozitës kundër qeverisë. Ai theksoi se PD do të vazhdojë betejën në Parlament dhe sheshe.

“Parlamenti de facto me këto gjëra është i asgjësuar. Por ne do vazhdojmë betejën tonë në parlament, në salla, në rrugë, në sheshe”, u shpreh ai.