Sot vendin e specialistit dhe ekspertit në administratë e kanë zënë patronazhistët. Kështu deklaroi kreu i Partisë Demokratike Sali Berisha gjatë një takimit me të larguarit nga puna. Në fjalën e tij Berisha theksoi se gjatë qeverisjes së tij administrata ishte pothuajse tre herë më e vogël se kjo e sotmja dhe përballoi reforma të një rëndësie të jashtëzakonshme nga anëtarësimi në NATO të liberalizimi i vizave.

“Me punën tuaj, administrata pothuajse tre herë më e vogël se kjo e sotmja përballoi me sukses të madh, reforma të një rëndësie të jashtëzakonshme. Proceset më serioze të vendit, anëtarësimin në NATO, marrëveshjen e Stablizim-Asociimit, arritjen e statusit të vendit kandidat, liberalizimin e vizave. Pra unë nuk them që ato ishin vite vrapi, jo, por ishin vite të ecje të pandalshme progresi në rritje. Nga 85 mijë punonjës që kishte administrata, sot janë rreth 190 mijë. Sot vendin e ekspertit, e punonjësit të përkushtuar, zyrtarit shërbëtor të qytetarëve, masivishit e kanë zënë patronazhistët dhe kjo është një e vërtetë e pamohueshme”, u shpreh Berisha.

Sipas tij largimet masive nga puna shdnërruan korrupsioni në sistem, ku shërbimi ndaj ligjit dhe qytetarit është zëvendësuar me shërbimin ndaj partisë dhe klaneve të krimit të drogës.

“Largimet masive nga puna e zyrtarëve të aftë, të përkushtuar, të mirëshkolluar, krijuan mundësi, hapësira që në Shqipëri të rrënohet siguria juridike, të rrënohet rendi, siguria që në Shqipëri me shpejtësi të madhe korrupsioni të shndërrohet në sistem. Ju ishit njerëz të ligjit dhe në periudhat, në vitet e shërbimit tuaj ndaj vendit, ju i shërbyet ligjit. Sot shërbimi ndaj ligjit dhe qytetarit është zëvendësuar totalisht me shërbimin ndaj partisë, klaneve të krimit, drogës, të korrupsionit”.