Qeveria amerikane po bën ‘një gabim të madh strategjik’ duke minimizuar rëndësinë e zgjerimit të shpejtë të marrëdhënieve Rusi-Kinë, ka paralajmëruar ish-Sekretari amerikan i Shtetit Mike Pompeo.

Aleanca midis Moskës dhe Pekinit ‘mund të jetë një martesë pa dëshirë mes palëve, por ata janë ende të martuar’, tha Pompeo për Fox News të mërkurën.

“Të dëgjosh Shtëpinë e Bardhë ta nënvlerësojë këtë si një gjë të parëndësishme apo të pavlerë është një gabim i madh strategjik”, shtoi ai.

Pompeo, i cili po fliste disa orë pasi presidenti kinez Xi Jinping përfundoi një vizitë në Moskë, ku u nënshkruan marrëveshje të shumta, theksoi se Kina ‘ka marrë energji me një çmim të zbritur’ nga Rusia.

“Mendoni për këtë. Kompanitë prodhuese amerikane po paguajnë ngarkesën e plotë për energjinë sot dhe kinezët po marrin një zbritje prej 15, 20% për çdo fuçi nafte, duke i lejuar ata të vazhdojnë të sjellin prodhimet e tyre këtu në Amerikë,” shpjegoi ai.

Ish-Sekretari i Shtetit pohoi gjithashtu se ‘të paktën për sot, Partia Komuniste Kineze po ofron ndihmë për Rusinë në luftën në Ukrainë, pothuajse me siguri’. Pekini ka mohuar më parë pretendimet se po furnizon ose planifikon të furnizojë me armë Moskën në mes të konfliktit të saj me Kievin, duke i quajtur akuza të tilla nga Uashingtoni ‘të rreme’. Rusia ka këmbëngulur gjithashtu se ajo mbështetet në armatimin e prodhuar në vend.

“Administrata Biden ka dështuar. Ata i kanë lejuar rusët dhe kinezët të bashkohen në këtë mënyrë dhe kjo paraqet rrezik të madh për SHBA-në dhe çdo qytetar amerikan”, vijoi Pompeo.

Duke komentuar vizitën e Xi në Moskë, zëdhënësi i Këshillit të Sigurisë Kombëtare të SHBA-së, John Kirby tha se ai nuk besonte se ekzistonte një aleancë midis Moskës dhe Pekinit, duke përsëritur sugjerimin e tij të mëparshëm se ishte thjesht ‘martesë me interes’.