Pjesa e dytë e historisë epike-futuristike “Dune”, e risjellë në ekranin e madh nga regjisori i njohur Denis Villeneuve, mund të përshkruhet veç me një fjalë: Drithëruese!

Këtë përshtypje të paktën të japin pamjet e para të princit Paul Atreides, i sjellë në jetë nga aktori Timothee Chalamet, i cili përtej detyrës së madhe për të marrë hak mbi vrasjen e të atit dhe për t’u rikthyer në fron, ka edhe dy misione të veçanta: Fitimin e zemrës së Chani (Zendaya) dhe ngjitjen mbi krimbat e shkretëtirës, të cilët mund t’i japin avantazhin në dunat gjigante të fisit Fremen.

Të lehtë nuk do ta ketë megjithatë, kur në rolin antagonist shfaqet tanimë jo vetëm Baroni famëkeq Vladimir (Stellan Skarsgard) apo Glossu Rabban (Dave Bautista), por edhe i riu Feyd-Rautha (Austin Butler), të cilin për të parën herë e shohim tashmë me vetulla të rruara dhe një shikim vrastar karshi Paul-it.

Ajo çfarë ngjedh më shumë gjithsesi, janë aspektet vizuale dhe kinematografike, për të cilat mbi pjesën e parë të Dune, Villeneuve rroku edhe gjashtë çmime Oscar.

Performanca në “box office” nuk është e garantuar, duke parë se pjesa e parë e filmit nuk ndoqi trajektoren e menduar të fitimeve monetare, por mes kritikëve, është e padiskutueshme se suksesi është i pranishëm.

Villeneuve vetë në fakt, e ka quajtur “Dune” projektin e tij më ambicioz dhe me 2 minutat e 20 sekondat që shihen në trailer, ai vërteton se e ka seriozisht për të mbyllur në pikun e lartë historinë epike – ashtu edhe siç i ka hije nga novela e famshme e Frank Herbert.

Në adaptimet e mëparshme televizive apo kinematografike, ka pasur gjithnjë kundërshti sa i takon zhvillimit të pjesës së dytë, për shkak edhe të efekteve pamore të cunguara në kohë.

Ndërsa, nën regjinë e Villeneuve dhe me avancimin e teknologjisë, shpresa e madhe (duke marrë garancinë e një suksesi vizual), mbetet adaptimi i mirë i skriptit dhe ngjarjes, për t’i dhënë shikuesit drithërimat e premtuara që me filmin e parë.