Kioske
Hajdeni në Shqipëri, ka turizëm dhe skllavëri !
Nga
Nëse harxhon miliona për zhvillim real, pas pesë vjetësh nuk ka nevojë të harxhohen miliarda për pastrim imazhi e zyra PR, po e nis kështu…
Sot, pronarët e zonave turistike, i kanë gati të gjithë punëtorët në të zezë dhe me mungesë totale menaxhimi mbajnë të gjithë stafin aktiv nga ora shtatë e mëngjesit deri pas mesnate.
I kam dëgjuar personalisht, punojnë nga 14-16 orë.
Nëse një punëtor, nuk e përballon fizikisht punën sfilitëse dhe kërkon të largohet me të drejtë, kërcënohet se nuk do të marrë rrogën, e cila nuk paguhet çdo javë apo çdo muaj, por do t’ju paguhet në fund të sezonit, nëse janë me fat.
Tani hajde ta diskutojmë, se si një njeri në të tilla kushte pune, ka gjendje shpirtërore e fizike, t’i ofrojë pushuesit një shërbim me standarde apo t’i shtrojë një tavolinë me rregulla bon-toni, kur gjithçka do donte është të kthehej në shtëpinë e vet e jo të shërbente 16 orë në temperatura zjarri pa as edhe një ditë pushimi nga qershori në shtator!
Nuk i bëhet apel botës, të vijë të shijojë perlat e vendit tënd, kur personat e shërbimit, të cilët janë impakti i parë që i huaji ka me vendin tënd,janë në kushte psiko-fizike të diskutueshme.
Çfarë mesazhi po i transmeton turistëve? Hajdeni se ka det me 10 lekë e skllevër?!
E gjithë kjo është shumë e shëmtuar, komplet e papranueshme dhe në kontrast të dukshëm me fasadat luksoze të ndërtesave e resorteve.
Nuk habitem fare, që kur i pyet të huajt çfarë të pëlqen nga Shqipëria, përgjigjen: “Natyra dhe njerëzit miqësor”.
Nuk të flasin për gjëra praktike, nuk të flasin për standard shërbimesh, thjesht japin një përgjigje diplomatike për të mos ofenduar vendin mikpritës dhe me naivitetin tonë kujtojmë se i kemi mahnitur, kur maksimu, i kemi lënë pa fjalë.
Nëse duam të bëjmë turizëm për shtresat e varfra të popujve të Evropës, të cilët nuk ja lejojnë vetes pushimet në vende më të spikatura, thuajeni haptas.
Por, nëse duam ta vlerësojmë vendin tonë e të tërheqim target pushuesish që realisht shpenzojnë, i gjithë projekti për turizmin, nëse ka një të tillë, duhet ri-kualifikuar.
Është e kotë të paguash New York Times, The Guardian, Le Monde e një mori blogger-ësh për të sjellë turistë, të cilët do të kthehen në vendet e tyre e do të bëjnë një publicitet negativ.
Turizmi masiv kërkohet kur ke kapacitete dhe burimet njerëzore të disponueshme dhe të mirë- trajnuara, për të ofruar një panoramë dinjitoze të asaj çfarë është vendi jot, në të kundërt do kesh një peridhë piku vizitorësh e pastaj hiçi.
