Kylie Jenner flet si rrallëherë për marrëdhënien me ish-shoqen e ngushtë, Jordyn Woods

Kylie Jenner dhe Jordyn Woods kanë pasur një shoqëri të gjatë e të bukur, para se gjërat të shkonin në një tjetër drejtim 5 vite më parë. Si rrallëherë, miliarderja e klanit Kard-Jenner, ka folur në episodin e ri të “The Kardashians” për raportin e saj me Jordyn.

Në një bisedë me Khloé, Kylie foli për momentin kur ajo dhe Jordyn u përshëndetën në Javën e Modës në Paris. Jenner tha se ishte qejf dhe se tanimë ato kanë një distancë të shëndetshme në miqësinë e tyre.

“Mendoj se kemi një distancë shumë të shëndetshme në miqësinë tonë. Besoj se flasim një herë në muaj”.

Gocat ishin shoqe të ngushta, derisa Jordyn, 26 vjeç, pranoi se puthi të dashurin e atëhershëm të Khloé, Tristan Thompson, në një festë në vitin 2019. Kylie, zemërthyer, ndërmori hapa për të mos vijuar më shoqërinë e saj me Jordyn, të paktën jo publikisht. Më pas, në vitin 2023, ato u shfaqën në Los Angeles së bashku.

“E adhuroj faktin që narrativa që qarkullonte në rrjet për ne ka marrë fund. Kur na panë duke u larguar nga restoranti, u bë histori për 1-2 ditë, por tani ka mbaruar. Njerëzit e dinë që jemi në rregull në marrëdhënien tonë dhe askush nuk flet më për këtë gjë”, shtoi Kylie.

GETTY IMAGES

Edhe pse Khloé e fajësoi Jordyn për “prishjen e familjes së saj”, në vitin 2021, ajo zbuloi se nuk i mban më inate, çka solli edhe pajtimin e Kylie-t me Jordyn. Megjithatë, ajo, në disa intervista ka pranuar se nevrikoset nga fiksimi i internetit për të rikthyer dramat e vjetra. “Ata gjithmonë vënë vajzat kundra njëra-tjetrës, edhe kur nuk ka një konflikt”, shprehej Khloé, duke shtuar se secili bën jetën e vet dhe nuk mendojnë dhe flasin më për këtë ngjarje.