Presidenti amerikan, Joe Biden, u kthye në Shtëpinë e Bardhë menjëherë pas lajmit për atentatin ndaj rivalit të tij, Donald Trump.

Biden ndodhej në rezidencën e tij në Delaware në momentin kur ndaj ish-presidentit amerikan u qëllua me armë zjarri në Pensilvani.

Shtëpia e Bardhë bëri të ditur se Biden ka folur në telefon me Trump pas ngjarjes.

Mediat amerikane raportojnë se Biden ka komunikuar gjithashtu me guvernatorin e Pensilvanisë, Josh Shapiro dhe kryetarin e bashkisë së Butler, Bob Dandoy, ku ndodhi atentati.

“Mirënjohje forcave të Shërbimit Sekret që i shpëtuan jetën. Nuk ka vend për këtë lloj dhune në Amerikë. Të gjithë bashkë si komb duhet ta dënojmë këtë akt”, ishte reagimi i Biden përmes një deklarate të shpërndarë nga Shtëpia e Bardhë.

 “Dhuna si kjo nuk ka vend në kombin tonë. Ne të gjithë duhet ta dënojmë këtë akt të neveritshëm dhe të bëjmë pjesën tonë për të siguruar që ai të mos çojë në dhunë të mëtejshme”, tha zëvendëspresidentja e SHBA Kamala Harris në një deklaratë.