Popullariteti global i telenovelave turke e ka renditur Turqinë në nivel lider si eksportuesja më e madhe e produkteve televizive, duke krijuar një imazh krejt ndryshe për vendin dhe duke tërhequr miliona shikues e turistë në zonat historike dhe kulturore të saj, të cilat janë edhe prapaskenat e shumë prej serialeve.

Suksesi i shfaqjeve televizive bëri që industria të rritej me miliarda dhe vazhdon të zgjerohet edhe më tej, thonë ekspertët.

Në mes të viteve 2020 dhe 2023, kërkesa në botë për serialet turke u rrit me 184% duke e pozicionuar Turqinë si një nga eksportuesit më të mëdhenj të shfaqjeve televizive në botë, sipas kompanisë “Parrot Analytics”.

“Arrijmë mbi 400 milionë shikues çdo natë nëpër botë”, ka thënë Izzet Pinto, drejtues i agjencisë “Global”, që eksporton seriale turke në tregjet e botës.

Edhe pse “Deli Yurek” ishte seriali i parë turk që u shfaq në Kazakistan më 2001 – ishte seriali “Gymysh” ai që i bëri telenovelat turke të njohura në botë. Ajo u bë jashtëzakonisht e famshme në Lindjen e Mesme.

“Një mijë e një netë”, një dramë e vitit 2006 e pushtoi Ballkanin. “Sulejmani i Madhërishëm”, bazuar në sulltan Sylejmanin e Perandorisë Osmane i hapi rrugë serialeve historike.

Dikur importuese e telenovelave latino-amerikane, tani Turqia eksporton telenovelat e veta në botë. Një sukses i tillë, sipas Pintos, është tipologjia e këtyre telenovela, ku subjektet e saj përqendrohen tek familja, lidhjet shoqërore, historitë e dashurisë, etj.

“Nuk ka lakuriqësi, nuk ka fjalë të pista, nuk ka urrejtje. Kështu që ato janë të shikueshme për familjen”.

“Ringjallja: Ertugrul” ishte seriali i katërt më i kërkuar në botë në maj 2020, me kërkesa mbi 68 herë më shumë se një shfaqje mesatare në botë, sipas “Parrot Analytics”.