Shqiptarët që jetojnë në Britaninë e Madhe u mblodhen në “Queen Elizabeth Olympic Park” në Londër, një hapësirë e ndërtuar për Lojërat Olimpike të vitit 2012, ku ishte parashikuar takimi me kryeministrin Edi Rama.

Salla ka një kapacitet prej mbi 4,500 vendesh dhe u mbush me flamuj kuq e zi nga shqiptarët që jetojnë dhe punojnë në Britani

Këto shkruan ndër të tjera gazeta “Tema”, ndryshe tellalli i dovletit. Po sigurisht që do gjenden përherë shqiptarë që tundin dorën ku mund të qëndrojë një flamur çfarëdo! Por këtu pyetja është se çfarë janë këta shqiptarë, si mendojnë e çfarë mendojnë që shkojnë të presin dikë që qeveris mbi të afërn të tyre, të mbetur kukudh në Shqipëri?! 

Çfarë mesazhi duan të dëgjojnë njerëz që kanë më shumë mundësi atje ku janë se në Shqipërinë e krimit? 

Flamuri nëse do duhej, do duhej për protestë, për turpin ku ra një vend i tërë. Jo për të sajdisur një njeri që nuk di cilin ministër do i arrestojnë. Cipa në faqe nuk bën dëm për shëndetin, mirë është ta mbash ndonjëherë. Dhe cipa i shkon edhe shqiptarëve, ndonëse nuk ka hyrë në modë. 

Ku duhet të udhëtojë shqiptari që të emancipohet politikisht? Të kuptojë se dalldi të tilla janë turp ndaj fëmijëve së pari e mandej ndaj vetes.

s.zaimi / Respublica.al