Teksti më poshtë është marrë nga ATSh dhe sugjerohet si lajm nën titullin: Komisioni i posaçëm antikorrupsion, nisin nga Durrësi forumet e “Dialogut qytetar”. Pra, nëse e kuptojmë drejt, Fatmir Xhafaj nis dialogun me qytetarët për luftën kundër korrupsionit. Hajde të mos qeshësh dhe te mos qash!

Dialogu ka nisur me Milva Ekonomin. Kush kupton gjë, i urojmë suksese! Universiteti “Aleksandër Moisiu” në Durrës ishte ndalesa e parë, nga ku nisi procesi i bashkëbisedimeve në forume publike me qytetarët dhe grupet e interesit për konsultimin e draftit të përgatitur nga ekspertët e nivelit të lartë të atashuar pranë Kuvendit dhe finalizimin e Dokumentit Analitik mbi situatën aktuale në fushën e Mirëqeverisjes, Antikorrupsionit dhe Sundimit të ligjit.

Pas 11 tryezave tematike të organizuara në Kryesinë e Kuvendit, ekspertët dhe anëtarë të Komisionit të Posaçëm, do të zhvillojnë disa forume në qytete të ndryshme të vendit me qytetarë, studentë, grupe interesi, përfaqësi biznesi, etj., për të ndarë gjetjet dhe analizën e kryer nga ekspertët, me qëllim gjithëpërfshirjen e të gjithë aktorëve të shoqërisë në këtë proces transformues për vendin.

Anëtarja e Komisionit të Posaçëm, Milva Ekonomi, e shoqëruar nga Sekretariati Teknik i Komisionit, zhvilluan një takim me pedagogë dhe studentë të Universitetit “Aleksandër Mloisiu” në Durrës.

Në nisje të takimit, Milva Ekonomi bëri një përmbledhje të objektit, fushës së veprimit, instrumentet dhe mekanizmat e funksionimit të Komisionit të Posaçëm, në funksion të procesit të integrimit europian të vendit, si dhe nënvizoi rëndësinë e gjithëpërfshirjes së gjithë shoqërisë në proces.

Ekonomi i njohu të pranishmit me disa nga gjetjet e ekspertëve të atashuar pranë Komisionit të Posaçëm, lidhur me situatën aktuale për çështjet e Mirëqeverisjes, Antikorrupsionit dhe Sundimit të ligjit.

Gjatë bisedës, Ekonomi u ndal në disa gjetje të ekspertëve lidhur me transparencën në reformën e administratës publike, efektshmërinë dhe integritetin e administratës publike, llogaridhënien e institucioneve të pushtetit qendror dhe vendore, ofrimin e shërbimeve të digjitalizuara ndaj qytetarëve dhe mbrojtjen e të dhënave personale të qytetarëve, efektivitetin dhe transparencën në menaxhimin e financave publike.

Më pas biseda u përqendrua në tezat për diskutim publik ku të pranishmit dhanë sugjerime konkrete lidhur me nevojën e përfshirjen më të gjerë të botës së akademisë dhe universiteteve rajonale në tryezat e diskutimeve.

Ata evidentuan nevojën për ndryshime ligjore për forcimin e rolit të klinikave ligjore në universitete, i nevojshëm për edukimin ligjor të shoqërisë, si dhe krijimin e nënkomisioneve të posaçëm në nivel lokal që mund të ndihmojnë në trajtimin e çështjeve që janë objekt pune të komisionit.

Po ashtu në takim u vlerësua nevoja për përfshirjen në diskutime të pushtetit vendor; rritjen e kapaciteteve teknike administrative në nivel lokal për të përfituar sa më shumë nga procesi i integrimit; ndërtimi i platformave interaktive ku qytetarët mund të aksesohen dhe të marrin informacion lidhur me procesin e integrimit apo ndryshimet ligjore të ndryshme; si dhe për rritjen e aksesit dhe përfshirjen në konsultimin publik të projektligjeve etj.

Të pranishmit ngritën pyetje lidhur me rolin e komisionit dhe fazat që do të ndiqen në prag të fushatës zgjedhore, zgjidhjet për qasjen më të lehtë ndaj teknologjisë për të gjitha moshat, mbrojtjen e të dhënave personale, zbatimin e Planit të Veprimit, si dhe angazhimin e vazhdueshëm të këtyre profesionistëve në këtë proces të rëndësishëm për Shqipërinë.

/Respublica.al