Rritje rekord e mjeteve elektrike në Shqipëri

Foto ilustruese

Shqipëria po përjeton një rritje të ndjeshme të përdorimit të mjeteve elektrike. Sipas të dhënave të DPSHTRR në vend numërohen rreth 6400 mjete plotësisht elektrike.

Vetëm gjatë vitit që lamë pas janë regjistruar 3 127 mjete elektrike, një rritje kjo me 72% në krahasim me 2023-in.

Viti 2024 ka shënuar rekord për numrin më të lartë të regjistrimeve që prej vitit 2019, kohë kur kishte vetëm 35 makina elektrike të regjistruara për herë të parë gjatë një viti.

Shumica e tyre rezultojnë se janë autovetura, pasuar nga automjetet për transport të përzier dhe motorët.

Ky trend pozitiv tregon një ndërgjegjësim të qytetarëve për përfitimet që ofrojnë mjetet ‘green’, si ulja e ndotjes mjedisore apo reduktimi i kostove.

Shtimi i mjeteve elektrike ngre gjithashtu nevojën për zgjerimin e pikave të karikimit.

Megjithatë në totalin e mjeteve të regjistruara në vitin 2024, ato elektrike zënë 3,1%. Shumica, 64% janë me naftë, dhe 23% benzine.