Pasaporta Europiane – Premtimi më serioz i bërë ndonjëherë

Koment nga Bilbil Beqiri

Gjatë këtyre viteve kemi dëgjuar një mori premtimesh elektorale – disa serioze, disa jo. Në fund të fundit, një fushatë zgjedhore është vetë akti i artikulimit të premtimeve dhe aspiratave. Por, pas shumë vitesh ku premtimet janë përqendruar në çështje bazike si rrugët, uji apo dritat, vjen një premtim që i tejkalon të gjitha: premtimi për pasaportën europiane.

Ky nuk është një premtim thjesht politik. Është një projekt historik, një ndryshim rrënjësor për të ardhmen e vendit. Futja e Shqipërisë në Bashkimin Europian është ndoshta dhurata më e madhe që mund t’i bëhet ndonjëherë shqiptarëve.

Integrimi sjell përfitime të mëdha dhe të drejtpërdrejta:

• Një transformim ekonomik marramendës, me më shumë investime dhe zhvillim.
• Ribrandim i Shqipërisë në arenën ndërkombëtare – nga perceptimi te respekti diplomatik.
• Vlera më e lartë e diplomave shqiptare, e cila i jep rinisë një shans të barabartë në tregun europian të punës.
• Rritje e turizmit, përmirësim i cilësisë së produkteve vendase dhe garantimi i të drejtave për të punuar, studiuar dhe jetuar kudo në Europë si qytetar i barabartë.

Shkurt: integrimi në BE nuk është thjesht një premtim politik, por një vizion për të ardhmen. Një super-premtim që meriton të kuptohet në gjithë përmasën e tij.

Ata që jetojnë në vendet e BE-së e kuptojnë më mirë se kushdo peshën reale të këtij premtimi. Ata e kanë provuar vetë fuqinë e pasaportës europiane. Për shumë të tjerë që s’e kanë pasur këtë mundësi, është e rëndësishme të mos e nënvlerësojnë – sepse ky nuk është një luks, por një e drejtë që Shqipëria e meriton.

/Podiumi.com media online prej vitit 2016