Edi Rama, në një takim në Shkodër, bëri një rezyme të investimeve të qeverisë në dekadën e fundit në këtë qark.

Kreu i PS theksoi se Bashkia Shkodër është më e paprekura nga investimet e qeverisë shqiptare në dekadën e fundit, pasi në krye të saj ishin demokratët, të cilët, sipas tij, kanë refuzuar bashkëpunimin, shkruan A2.

“Ndryshe nga të gjitha qarqet e tjera, në këtë qark ka një gropë prej 10 vitesh. Gropa është e Bashkisë së Shkodrës. Deri përpara se këtu Beneti të merrte detyrën, këtu nuk bëhej fjalë për projekte. Në një dekadë, Shkodra ka marrë më pak investime në këtë qark. Jo se nuk kemi dashur, por nuk kishim bashkëpunim. Gjithsesi ka një gjë që më bën shumë krenar, por që është një nga shumë mitet e ngritura artificialisht, pa asnjë bazë. E keni dëgjuar frazën: “Edi Rama nuk do veriun, nuk do veriorët. Në atë pemën e komplikuar të familjes time, e kam në rrënjë. Me historinë e Shkodrës kam qenë shumë i lidhur. Gjyshja ime katolike më ka ndikuar shumë. At Zef Pëllumbin kam pasur privilegjin ta kem mik”, tha Rama, përpara se të niste rezymenë.

“Këtu, 315 kilometra rrugë të brendshme në qarkun Shkodër në dekadë. Sot, 95% e territorit ka akse të aksesueshme, o me rrugë të bardha, o me rrugë me asfalt. Më shumë se çerek miliard euro investime për qarkun e Shkodrës: 414 projekte. Rindërtimi urban: afro 50 milionë euro, dhe këtu flasim për Malësi e Madhe, Pukë, Fushë-Arrëz, Vau i Dejës dhe këtu një pjesë e konsiderueshme ka hyrë tani dhe është Bashkia Shkodër.
Ujësjellës-kanalizime: 73 milionë euro janë investuar deri tani në 43 projekte.
Energjia: 124 projekte, 809 milionë euro investime.
Bujqësia: 43 milionë euro mbështetje për qarkun e Shkodrës.
Arsimi: këtu është për të ardhur keq që nuk kemi më shumë, por tani ka filluar të ndryshojë për shkak të projekteve të reja të shkollave në Shkodër.
Shëndetësia: 19 milionë euro, 56 projekte.
Kultura: 3.5 milionë euro, me Benetin besoj që do shkojë më shumë.
Investimi i përgjithshëm i qeverisë për qarkun e Shkodrës: 1.31 miliardë euro”, u shpreh Rama.