Bilal Kara

Publikohet fotoja e aksionerit në kërkim të klinikës private ‘International Medicare’, 45-vjeçari turk Bilal Kara. Klinika ‘International Medicare’ u bllokua pasi nuk deklaroi 1 mln € fitime. 

Pas operacionit në pranga ra administratori i fundit Edmond Zaja, në kërkim janë shpallur 2 aksionerët e klinikës.

Mesohet se Bilal Kara dhe Geriana Arapi, rezultojnë të jenë jashtë territorit shqiptar. Përveçse klinika nuk kishte deklaruar fitimet gjatë kësaj kohe, shërbimet spitalore (kirugji plastike) kryheshin me produkte të ndaluara për përdorim.

Ndërsa në kinikë pesë punonjës ishin të pasiguruar. Gjatë kontrolleve të kryera, policia sekuestroi 100 blloqe me mandate të pafiskalizuara, 27 lloje medikamentesh të dyshuara të skaduara dhe 6 njësi kompjuterike.

“Gjatë operacionit “Bilanci”, shërbimet e Sektorit për Hetimin e Krimeve Ekonomiko-Financiare arrestuan administratorin e spitalit, shtetasin E. Z., 62 vjeç, si dhe shpallën në kërkim bashkaksionerët e subjektit, shtetasin turk B. K., 45 vjeç dhe shtetasen shqiptare G. A., 32 vjeçe.

Gjatë periudhës hetimore disamujore, në koordinim me Prokurorinë e Tiranës, si dhe nga kontrollet në subjekt, u konstatua se nëpërmjet lëshimit të faturave të pafiskalizuara, ishte kryer evazion fiskal me vlerë mbi 1 000 000 euro. Gjithashtu, në spital përdoreshin medikamente të dyshuara të kontrabanduara, të ndaluara për përdorim, nga autoritetet kompetente, si dhe ishin punësuar pa u siguruar, 5 shtetas.

Punohet për kapjen e 2 shtetasve të shpallur në kërkim, si dhe për provimin e plotë të këtyre veprimtarive kriminale.

Materialet procedurale iu referuan Prokurorisë së Tiranës, për veprime të mëtejshme”, njoftoi policia.