Yolanda Hadid ka rrëfyer hapur për vështirësitë që po kalon vajza e saj, Bella Hadid, gjatë trajtimeve kundër sëmundjes Lyme.

Në një postim prekës në Instagram, ajo publikoi disa foto të Bellës dhe tregoi dhimbjen që ka përjetuar vajza e saj kohët e fundit. “Paaftësia e padukshme që sjell kjo sëmundje kronike është e vështirë për t’u shpjeguar. Dhimbja ime nuk mund të krahasohet me atë që po kalon vajza ime”, u shpreh Yolanda.

Ajo e cilësoi Bellën një luftëtare të vërtetë, që ka duruar me forcë një periudhë të gjatë vuajtjesh. “Bella ime e bukur, je e guximshme dhe e pathyeshme. Asnjë fëmijë nuk duhet të përballet me një sëmundje të pashërueshme. Të admiroj për forcën dhe vullnetin që vazhdon të tregosh përballë gjithë pengesave. Nuk ka fjalë të mjaftueshme për të përshkruar errësirën, dhimbjen dhe ferrin që ke kaluar”, shkroi ajo mes emocionesh.

Në vijim, Yolanda tregoi se Bella ka përfunduar një muaj tjetër trajtimi, duke theksuar shpresën se ditë më të mira do të vijnë. “Kjo sëmundje na ka gjunjëzuar, por ne gjithmonë ngrihemi. Do të vazhdojmë të luftojmë bashkë”, shtoi ajo.

Ky mesazh erdhi vetëm një ditë pasi Bella publikoi vetë disa imazhe nga spitali, duke u kërkuar ndjekësve ndjesë për mungesën e saj në jetën publike.

Bella Hadid u diagnostikua me Lyme në vitin 2012, një sëmundje me të cilën po përballen gjithashtu edhe nëna e saj Yolanda dhe vëllai i vogël Anwar.