2 rrëfimet e Xhisiela Malokut, gjithçka deklaroi 25-vjeçarja në studiot televizive

Mbrëmjen e djeshme, 25-vjeçarja Xhisiela Maloku u shfaq në dy media në dy intervista të ndryshme. Fillimisht ajo u shfaq në një intervistë në emisionin “Open” në “Top Channel” dhe më pas në “Opinion” në “TV Klan”.

Në intervistën e dhënë për Eni Vasilin, Maloku mohoi dhunën e ushtruar ndaj saj prej Rexhep Rrajes. 25-vjeçarja tha se denoncimin në polici e kishte bërë nga xhelozia dhe inati dhe nuk ishte shtyrë nga asnjë motiv tjetër.

Ndërsa mohoi edhe të ishte ushtruar dhunë ndaj saj, teksa theksoi se intervistat e dhëna në media ishin të pasakta.

 “Është e vërtetë që më ka marrë telefonin dhe ma ka thyer. Kjo ka ndodhur brenda një hoteli. Në hotel më ftoi Rexhepi. Aty pati zënka normale, vetëm një shuplakë pati në hotel. Vetëm një shuplakë e lehtë, jo ato që janë thënë nëpër media. Në datën 20 kam shkuar në komisariat, por nuk e kam bërë denoncimin. Nuk e bëra sepse u qetësuam. Dola nga komisariati, e takova dhe më kërkoi falje. Ai ishte aty sepse i thashë unë më parë që do e denoncoja. U sqaruam dhe m’u mbush mendja që ta fal. Pasi u pajtuam, në datën 21 shkova sërish në komisariat pasi nuk e mbajti fjalën e dhënë. Ai iku me një tjetër me pushime. Atë natë, në datë 20 u nis. E mora vesh nëpërmjet shoqeve. Në fillim nuk i besova, por doli që ishte e vërtetë. Nga inati shkova dhe e denoncova për dhunë.” – tha Maloku.

Xhisiela Maloku mohoi gjithashtu që shenjat në trup dhe të djegurat më cigare i ishin bërë nga Rexhep Rraja duke pretenduar se i kishte bërë vetë, një formë vetëndëshkimi sa herë që zihej me djalin e deputetit.

Në përfundim të intervistës me Eni Vasilin, kjo e fundit ka thënë se kur i kishte kërkuar të resë që të shkonte në emisionin “Live”, Maloku i ishte përgjigjur se e kishin urdhëruar të shkonte në një studio tjetër ndërsa shtoi se intervista e saj ishte e pamanipuluar siç deklaroi vajza e re në studion e një tjetër emisioni pak më pas.

Akuzat për montimin e intervistës së dhënë për Top Channel, Maloku i bëri në “Opinion”, teksa deklaroi: “Unë dua të them diçka, tek ajo intervistë që është dhënë në Top Channel është e montuar. Ata kanë dhënë kontekstin që kanë dashur të japin.”

Në intervistën e dhënë fillimisht me gazetarin Fevziu në “Opinion”, 25-vjeçarja e mohoi dhunën ndaj saj prej Rexhep Rrajës, duke thënë se e kishte bërë denoncimin për xhelozi dhe se ishte “tallur” me policinë, por më pas teksa gazetarën po i thonin se faktet dhe denoncimet në polici flisnin kundër intervistave të saj të dhëna në media, Xhisiela Maloku u shpreh se të vërtetën e dinte vetëm ajo dhe do e tregonte aty ku duhej.

“Të vërtetën e di unë, do ta them atje ku duhet. Kjo është deklarata ime e vërtetë, ajo që dëgjuat dhe ajo që kam për të thënë. E vërteta jam unë dhe të vërtetën e di unë. E vërteta është kjo intervistë që dhashë dhe kjo është dalja ime e fundit në publik. Unë dua të them diçka dhe dua të largohem. Unë këtë e dhashë me vullnetin tim të plotë. Ndërsa, kjo është intervista ime e fundit.”

Pas kësaj Maloku është larguar nga studioja e emisionit