Mediu flet për ngjarjen në Elbasan: Ka një strukturë të krimit të organizuar që bashkëpunon me Ramën!

Kryetari i PR-së dhe kandidati për deputet nga lista e PD në Tiranë Fatmir Mediu foli për ngjarjen e rëndë në Elbasan me 1 viktimë dhe 4 të plagosur gjatë një interviste në “Ora News”.

Ai hodhi akuza të forta ndaj kryeministrit Edi Rama dhe Partisë Socialiste duke u shprehur se ka ngritur një strukturë paralele me anëtarë të krimit të organizuar.

“Pëveç strukturës policore, Shqipëria ka edhe një strukturë të mirëorganizuar militare e krimit të organizuar që është në bashkëpunim me Edi Ramën në të gjithë territorin e Shqipërisë. Kjo filloi të strukturohej gjatë mbjelljes së kanabisit dhe më tej me trafikun e drogërave të rënda. Është një strukturë kriminale që kontrollohet dhe menaxhohet nga struktura të PS-së.

Pa dyshim, në këto momente zgjedhore, ata janë të angazhuar në shit-blerjen e votës, në intimidimin e votuesve, në intidimidimin e krahut të djathtë të administratës publike prandaj e kam ngritur kërkesën që opozita, siç është e organizuar sot, duhet të jetë e organizuar në çdo qendër votimi për të mos lejuar blerjen dhe manipulimin e votave dhe intimidimin e votuesve.

Ajo që ndodhi në Elbasan tregon qartësisht se strukturat e krimit të organizuar janë të njësuar me strukturat lokale e qëndrore të PS-së dhe asaj që nga ngelur nga PS-ja dhe me strukturat e shtetit. U provua edhe gjatë Ditës së Verës. Edi Rama doli fare hapur në mbështetje të strukturave kriminale”, tha ndër të tjera Fatmir Mediu.