---

Moderatorja e njohur Lei Kraja ka vendosur që të tregohet “hermetike” përsa i përket jetës personale.

Prezantuesja sportive do zbulojë mashkullin që do i rrëmbejë zemrën vetëm kur të shkojë altar.

Gjatë një interviste në “Pushime on Top”, Lei Kraja u shpreh se është shumë romantike dhe nëse partneri nuk do i sillte kafen në shtrat do preferonte të qëndronte vetëm.

E pyetur nëse aktualisht është në një lidhje, ajo u përgjigj: “Flirt kemi, por … publicitet. Jam romantike, e pres kafen në shtrat, dua të përkëdhelem. Nëse jo, më mirë vetëm. Kush tha që jam vetëm?! Jetën private e kam thënë nuk e zbuloj, por kur të martohem do ta tregoj.”

“Në këtë moment që flasim zgjohesh nga krevati dhe të përkëdhelin?”- ishte pyetja që iu drejtua.

“Mund ta kem kafen (qesh)”- shtoi moderatorja.

Lei Kraja tregoi se gjatë pushimeve në Palasë e shoqëronte vëllai i saj, Bekimi, të cilin vendosi ta prezantonte për herë të parë me publikun.

“Në Palasë kam ardhur me vëllain tim. Jemi katër fëmijë, ky është vëllai im i preferuar, quhet Bekimi por nuk flet shqip,”- u shpreh ajo.

“A është single Lei Kraja?”- e pyeti moderatori, vëllain e saj.

“Mendoj se është”, u përgjigj ai.

Ndërsa tregoi edhe karakteristikat e së motrës: “Ajo merr gjithmonë atë që do. Është pak emotive. Nuk është se qan shumë. Më pëlqen shumë Shqipëria, dhe plani është të martohem me vajzë shqiptare.”

“Është single, kështu që vajza …”, shtoi Lei Kraja.

Prezantuesja sportive tha se, sipas saj, politikani më sharmant është kryeministri Edi Rama dhe do të pëlqente ta intervistonte.

Ndërsa u shpreh se futbollisti më simpatik është Marash Kumbulla, por që nuk do dilte në takim me të, pasi është më i vogël në moshë.

“Edi Rama është politikani që do të doja të dëshiroja ta intervistoja, pasi është gaforre. Më pëlqen, është nice. Më pëlqen si vishet, nuk e votova por më pëlqen. Votën e mbaj të fshehtë. Më simpatiku nga futbollistët është Kumbulla, duke qenë se është shkodran dhe do bëhet një super yll.

Më pëlqen më shumë kumbulla. Nga ana e pamjes është mirë. Në date s’do pranoja sepse është më i vogël se unë dhe nuk do dilja me një mashkull më të ri se vetja, kurrë se kam bërë. Asnjëherë, s’më ka rastisur, por më pëlqejnë meshkujt më të pjekur”, tha ajo.

Lei Kraja foli edhe arsyen përse hoqi dorë nga programi i humorit “Portokalli”.

Moderatorja tha se ishte impenjative dhe gjatë punës aty kuptoi që aktrimi nuk ishte për të.

Ajo u shpreh se do dëshironte të ishte prezantuese e programit, por gjatë audicioneve u zgjodh kolegia e saj, Fjoralba Ponari, që sipas Lei Krajës ishte një “zgjedhje e duhur dhe e goditur”, si edhe nuk është mërzitur aspak që nuk e fitoi vetë.

Ndërsa theksoi se nëse i ofrohet si mundësi do të dëshironte të prezantonte spektalin e humorit krah Salsano Rrapit dhe Fjoralba Ponarit.

“E mendoja më pak impenjative, u shkëputa pak pasi ishte eksperiencë e bukur, por jo e duhura për mua. Do ishte më ndryshe nëse do isha në krye, prezantuese, sesa aktore. Nuk ishte aktrimi për mua, është ndryshe kur je e ftuar për një skeç, që ta bëjnë shumë të thjeshtë. Nuk e gjeta shumë veten?

Do kisha më shumë dëshirë të isha prezantuese e programit, e kush nuk do të donte ta prezantonte një program të tillë? Audicionet erdhën, por u zgjodh Fjoralba që ka qenë zgjedhje shumë e duhur, shumë e goditur. Nuk u mërzita që nuk u përzgjodha, jam me idenë që çfarë më takon, më takon. U shkëputa, jo se nuk e bëja dot por nuk ishte për mua. Nëse do kisha rol tjetër do të kthehesha në Portokalli, por jo në atë rol.

Nëse më ofrohet si mundësi do ta konsideroja prezantimin me Salsanon dhe Fjoralbën. Por nuk varet nga unë”, përfundoi Lei Kraja.