Shefja e Infektivit, Najada Çomo dorëzoi mandatin e deputetes pa shkelur një ditë në Parlamentin e ri.

Vendimin e bëri publik kryeministri Edi Rama në fjalën përmbyllëse të mandatit të dytë qeverisës.

Sipas kryeministrit, Çomo ka paraqitur dorëheqjen nga mandati për të qëndruar pranë ekipit të saj të bluzave të bardha në spitalin Infektiv, për shkak të situatës së krijuar nga varianti ‘Delta’ i Covid-19.

“Jam i prekur nga komunikimi me Najada Çomon, ajo më kërkoi para pak kohe të pranoja tërheqjen e saj nga roli i ri i deputetes duke ndjerë shumë të fortë detyrimin për të mos u ndarë nga ekipi i saj kur varianti Delta i virusit arriti të rimbushë shtretërit e pavionit të terapisë intensive.

E falënderoj edhe publikisht siç e falënderova personalisht për këtë shembull kuptimplotë për detyrën ndaj atyre në nevojë, e i them sot faleminderit, e gjithë atyre që deri këtu na kanë nxjerrë me kokën lart përballë armikut të padukshëm”, tha Rama.

Por sa qëndron ky arsyetim i Ramës?

Ky vendim duket se nuk qëndron nëse bëjmë një krahasim të situatës aktuale të pandemisë me periudhën kur vetë Rama e prezantoi mjeken si kandidaten ‘surprizë’ në zgjedhjet e 25 prillit.

Nëse i referohemi shifrave zyrtare të Ministrisë së Shëndetësisë, në 4 mars, ditë kur Rama e prezantoi Çomon me bujë si deputeten e re nën siglën e PS, pasi e renditi të dytën në listën për qarkun e Tiranës, rezulton se asokohe, gjendja e krijuar nga Colvid-19 ishte shumë më e përkeqësuar se sot, kur edhe qindra shqiptarë tashmë janë vaksinuar me të dyja dozat anti-Covid.

Kështu, sipas ministrisë së Shëndetësisë, në bilancin ditor të 4 marsit janë raportuar 847 raste të reja dhe 20 humbje jetë, ndërsa në ditët e fundit numri i infektimeve është thuajse i njëjtë, por me një numër shumë më të ulët të fataliteteve në njerëz.

Në këto kushte, kandidimi dhe më pas largimi i Çomos nga Parlamenti ngre dyshime të forta se emri i saj ishin thjeshtë mjet për fushatë, që mund të kenë justifikuar edhe qëllimin e kryeministrit Rama për zgjedhjet e 25 prillit.