Kryeministri Edi Rama ka mohuar të ketë pasur një bisedë me presidentin serb Aleksandër Vuçiç për zhvillimet e fundit në veri të Kosovës. Rama ka ironizuar duke thënë se nuk ka pasur asnjë bisedë me “vëllaun e tij Vuqiq”.

Rama theksoi se e drejta është me Kosovën dhe se nuk janë provokime për Njësinë Speciale të Kosovës.

“Nuk kam pasur një bisedë me presidentin Vuçic apo siç shpesh herë miqtë e mi kosovarë thonë në rrjetet sociale “me vëllain tim Vuqiq”. Këtu jemi në kushtet kur e drejta është me Kosovën dhe kaq dhe kjo është shumë e qartë kshuqë ne jemi absolutisht në krah të Kosovës siç është i gjithë komuninteti ndërkombëtar dhe thashë leximi i çuarjes së forcave speciale për të bërë teatër me helikopterë e aeroplanë, është i gabuar. Përfytyrojeni dhe le ta përfytyrojë edhe ‘vëllau jem’ sikur aty të kishte ndodhur diçka. Natyrisht i takon kryeministri të Kosovës të marrë vendimet e duhura që kjo të shërbejë për të çuar para dialogun Nuk duhet ta harrojmë ndodhi me tarifën 100%. Ajo tarifë u kthye në litar në këmbët e Kosovës sepse kaloi nga një akt për të shtruar problemin në një akt më të madh se problemi. Albini dhe kolegët e kanë gjithë largpamësinë për të mos e çuar në atë pikë. Ato djegiet e institucioneve nuk i provokojnë forcat e rendit të sigurisë së Kosovës. Ato djegiet i provokojnë fluturimet akrobatike të aeroplanëve dhe marrja peng e qytetarëve të Kosovës në kushtet e një dialogu që nuk ecën ashtu si duhet. Unë jam i bindur se dialogu është rruga e duhur,” është shprehur Rama.