Reçeli i qershive është një recetë klasike dhe e domosdoshme për t’u pregatitur në këtë periudhë, duke qenë se qershitë janë në kulmin e tyre . Ashtu si shumica e recelrave, nuk është i vështirë për t’u realizuar, vetëm kërkon pak durim në heqjen e farave të qershive. Por, duke marrë parasysh që rezultati final do të jetë një mëngjes i shëndetshëm për të gjithë familjen tuaj, ja vlen “të sakrifikoni” disa orë.

Përberësit për rreth 1kg recel

• 1kg qershi të qëruara nga bërthamat (ose 1.3kg qershi të paqëruara)
• 600gr sheqer
• lëkuren e 1 limoni

Për pregatitjen e recelit me qershi, fillimisht lajmë nën ujë të rrjedhshëm qershitë, i thajmë me letra kuzhine dhe i heqim bërthamën me anë të paisjes së posacme apo duke i ndare në dy gjysma. I vendosim në një enë të thellë, shtojmë sheqerin, lëkurën e limonit të prerë sa më hollë (pa pjesen e bardhe e cila është e hidhur) dhe 2-3 lugë nga lëngu i limonit. E lëmë të gjithë përberjen të pushojë për rreth 6-8 orë ne frigorifer, apo akoma më mirë sikur ta lëmë gjithë naten. Kur të ketë kaluar kjo kohë, eleminojmë lëkuren e limonit dhe vazhdojmë me pregatitjen.

E vendosim të gjithë masen në një tenxhere të thellë dhe e gatuajm në zjarr mesatar për rreth 1 orë duke e perzierë herë pas here dhe duke i hequr shkumen që formohet me ndihmën e një luge. Receli do të jetë gati në momentin që do të hedhim një pikë mbi një pjatë të vogël dhe ajo do të qendrojë kompakte, pra nuk do të përhapet.

E hedhim recelin akoma shumë të nxehtë nëper kavanoza të sterilizuar paraprakisht sipas mënyres që do ta gjeni ketu. I mbyllim menjeherë hermetikisht dhe i përmbysim mbi një platformë druri, psh mbi prëresen e mishit derisa të jetë ftohur plotësisht.
Së fundi, e ruajmë recelin tonë në një vend të erret dhe pa lagështirë deri në momentin që do ta përdorim.

• Këshillë: Sasia e sheqerit mund të variojë nga embelsia e qershive apo nga kohëzgjatja e ruajtjes së recelit, pra sa më shumë kohë dëshirojmë ta ruajmë recelin për një konsumim të mëvonshem, aq më e larte duhet të jetë ëmbelsia e tij (deri ne raportin 1:1), dhe anasjelltas.