Që nga viti 2018, revista prestigjioze ‘Forbes Italia’ shpërblen më të mirët e sipërmarrjes rinore italiane. Të rinj që me idetë e tyre vizionare kontribuojnë për të revolucionarizuar mënyrën se si ne jetojmë, punojmë, argëtohemi apo edhe hamë. Është një komunitet që edhe këtë vit do t’u japë hapësirë sipërmarrësve, menaxherëve, artistëve, sportistëve dhe shkencëtarëve që kanë pasur guximin të investojnë në projektet e tyre dhe t’i realizojnë suksesshëm ato.

Në një skenar gjeopolitik të paqëndrueshëm dhe të rrezikshëm si ky që jetojmë, të flasësh për talentin nën moshën 30-vjeçare është shërim. Është një mënyrë për të kujtuar se në Itali (dhe, pa dyshim, në çdo vend tjetër të botës) ka shumë talente nga moda, sporti, kujdesi shëndetësor, teknologjia dhe financa – në pothuaj çdo fushë, që po ndryshojnë vendin duke prezantuar idetë e tyre brilante në të gjithë botën.

Rreth 100 emra të rinjsh janë të ndarë në 20 kategori, duke u prezantuar së bashku me 600 emrat e ‘Forbes USA’ dhe duke treguar se edhe në një periudhë kaq të errët si kjo që po jetojmë, kreativiteti nuk ka bërë kthim pas.

Në kopertinën e marsit 2022, më e mira e të rinjve italianë është Camilla Colucci, bashkëthemeluese e ‘Circularity’, një platformë industriale që integron në një sistem të vetëm të gjithë aktorët e ekonomisë: “Katër vjet më parë kompanitë nuk ishin të prirura (disa ende nuk janë) për të përdorur shërbimet online të ofruara si ‘ankande’ të mbetjeve të tyre; prandaj ne kemi aktivizuar shërbimet e konsulencës tekniko-strategjike për t’i drejtuar ata drejt një ndërgjegjësimi më të madh për vlerën e simbiozës industriale”,– thotë Colucci ndër të tjera.

Mes dhjetëra emrave të tjerë të të rinjve të talentuar, “Forbes” rendit Giulio Bozzo e Andrea Marec, bashkëthemelues të ‘Reasoned Art’; 18-vjeçaren Arianna Pozzi, e cila në moshën 15-vjeçare themeloi startup-in e teknologjisë së modës ‘Gaia My Friend’, një aplikacion që falë inteligjencës emocionale, hyn në empati me përdoruesin duke i dhënë këshilla stili.

Emra të tjerë të rinjsh që kanë kontribuuar në fusha të ndryshme të jetës, si; teknologji, shkencë, art, fashion design etj, ‘Forbes’ rendit:

Andrea Saliola e Pier Paolo Ceccaranelli, Gabriele Bianchi, Andrea Lippolis, Alessandro Marinella, Chiara Marconi, Irene Gullotta e shumë të tjerë.

Të gjithë këta të rinj, me moshë maksimale 30 vjeç, janë talente që premtojnë në fusha të ndryshme të jetës, që me artin e tyre janë kthyer në burim frymëzimi jo vetëm për bashkëmoshatarët, por të gjithë brezat që besojnë se e ardhmja, pa dyshim, do të jetë më e mirë nëse ua besojmë atë atyre që guxojnë dhe gjejnë hapësira edhe në skutat më të errëta ky sytë nuk mund të shquajnë.