Deputeti demokrat Belind Këlliçi dha detaje nga diskutimi i sotshëm në mbledhjen e grupit parlamentar të PD.

Për Syri Tv, Këlliçi tha se Enkelejd Alibeaj foli në mbledhje jo si kryetar, por si një drejtues i DASH i cili po iu përcillte deputetëve leksione demokracie. Këlliçi shtoi se deputetët e tjerë kanë shfaqur një frymë bashkimi duke tentuar të gjejnë një zgjidhje për ta arritur.

Këlliçi theksoi se nga selia e PD janë hequr gati 1.2 ton hekur që u përdor nga Lulzim Basha, për të blinduar selinë blu në protestën e 8 Janarit.

“Të flasësh për bashkim, ndërkohë që vijnë deputetët në një seli që është çliruar më në fund ky janë hequr 1.2 ton hekur të blinduar dhe deputetët e pezulluar apo përjashtuar vijnë në frymë të bashkimit dhe duan të gjejnë një zgjidhje edhe pse mund të jenë fitimtarë brenda debatit të brendshëm, nuk shfaqin asnjë xhest revanshi apo supremacie asgjë, pra vijnë për të gjetur një zgjidhje dhe të flasësh për bashkim kur vijon dhe kërkon përjashtimin kjo është absurde dhe vetëm Alibeaj mund ta bëjë.

Në mbledhjen e grupit ne shkuam dhe ia njohëm të drejtën e kryetarit të grupit përsa kohë që nuk kemi një vendim tjetër të Komisionit të Rithemelimit, Alibeaj mbetet në funksionin e kryetarit të grupit, por sot nuk e kuptova se Alibeaj ishte drejtues i grupit parlamentar apo ishte drejtues i DASH sepse kishte marrë përsipër të na jepte leksione demokracie dhe të politikës amerikane dhe të jepte dhe të mbante qëndrime të DASH”, tha Këlliçi.