Të rriturit e shëndetshëm mund të kenë diarre disa herë në vit, zakonisht pa ditur saktësisht se çfarë e shkaktoi problemin. Shumë njerëz mund të mos e kuptojnë se ka disa ushqime që shkaktojnë diarre.

Njerëzit me sëmundje inflamatore të zorrëve (sëmundja e Crohn dhe koliti ulceroz) mund të kenë diarre gati  konstante kur sëmundja është aktive dhe inflamacioni është i pranishëm në traktin e zorrëve.

Njerëzit me sindromën e zorrës së irrituar (IBS), dhe veçanërisht ata që kanë tipin mbizotërues të diarresë (IBS-D) gjithashtu mund të zbulojnë se disa ushqime përkeqësojnë simptomat dhe shkaktojnë jashtëqitje të lirshme.

Për njerëzit që kanë sisteme tretëse shumë të ndjeshme, këto ushqime mund të shkaktojnë një episod të diarresë, madje edhe pa ndonjë sëmundje apo gjendje tjetër themelore. Nëse keni diarre, shmangia e ushqimeve të renditura më poshtë mund të jetë e dobishme në zvogëlimin e ashpërsisë, si dhe sa zgjasin jashtëqitjet e lirshme.

Qumësht

Laktoza, sheqeri që gjendet natyrshëm në qumësht, mund të shkaktojë diarre te disa njerëz. Kjo gjendje quhet intolerancë ndaj laktozës dhe është shumë e zakonshme tek njerëzit mbi moshën 2 vjeç

Simptomat e intolerancës ndaj laktozës mund të përfshijnë gazra, diarre, fryrje të barkut, ngërçe, të përziera dhe frymëmarrje shumë të keqe. Shmangia e produkteve të qumështit është zakonisht mënyra për të parandaluar diarrenë e shkaktuar nga intoleranca e laktozës.

Megjithatë, ka produkte pa recetë që mund të ndihmojnë në tretjen e sheqerit të qumështit. Madje ka produkte qumështi që e kanë të hequr laktozën në të, gjë që e bën më të lehtë tretjen.

Intoleranca ndaj laktozës nuk është e njëjtë me alergjinë e vërtetë të qumështit. Njerëzit me alergji nga qumështi duhet të shmangin të gjitha produktet e qumështit, madje edhe ato pa laktozë, sepse nuk është sheqeri në qumësht që shkakton alergji, por proteina.

Speca djegës

Specat djegës janë një shkak i shpeshtë, por ato shpesh nuk shkaktojnë diarre deri në disa orë pasi të hahen.Për shkak të kësaj vonese, disa njerëz mund të mos e bëjnë lidhjen.

Ekziston një substancë e quajtur kapsaicinë në lloje të caktuara të specave që mund të shkaktojë diarre. Kapsaicina përdoret gjithashtu në vajrat që trajtojnë artritin.

Kazeina, e cila është një proteinë që gjendet në qumësht, mund të zvogëlojë efektin e djegies së kapsaicinës. Përveç kapsaicinës, disa njerëz mund të zbulojnë që farat dhe lëkura e specit janë gjithashtu të vështira për tu tretur.

Kafeina

Kafeina përshpejton sistemet e trupit, përfshirë tretjen. Disa njerëz janë më të ndjeshëm ndaj kafeinës se të tjerët, por shumë kafeinë mund të çojë në diarre.

Kafeja, çaji dhe soda janë vendet e zakonshme për të gjetur kafeinë. Burime të tjera, më pak të njohura të kafeinës përfshijnë çokollatë, çamçakëz, madje edhe disa aroma të ujit në shishe.

Kafeja mund të bëjë që disa njerëz të kenë një lëvizje të zorrëve,  por kjo mendohet të ketë më pak lidhje me përmbajtjen e kafeinës dhe më shumë nga substancat e tjera që përmban kafeja.

Yndyra artificiale

Olestra, një zëvendësues i dhjamit, është bërë i njohur për shoqërimin e saj me “rrjedhje anale” dhe diarre, të cilat janë problemet që njerëzit do të donin të shmangnin.

Ndërsa Administrata e Ushqimit dhe Barnave FDA arriti në përfundimin se efektet nga olestra janë “të rralla” dhe “të lehta”, njerëzit me aparate tretëse të ndjeshme mund të përjetojnë ende diarre pasi ta hanë atë.

Olestra mund të gjendet në shumë produkte (më të famshmet patate të skuqura), veçanërisht ato që tregtohen si “të lehta”, “me pak yndyrë” ose “pa yndyrë”.

Zëvendësuesit e sheqerit

Zëvendësuesit e sheqerit si sorbitol dhe manitol mund të gjenden në një shumëllojshmëri ushqimesh, duke filluar  nga karamelet deri te kosi. Edhe të ashtuquajturat ushqime të shëndetshme të cilat shpesh reklamohen si “pa sheqer” mund të përmbajnë këto aditivë, kështu që leximi i etiketave të ushqimeve do të jetë çelësi për t’i shmangur ato.

Shumë nga këto ëmbëlsues mund të gjenden edhe në burime natyrore, të tilla si pemët dhe perimet.

Këto aditivë ushqimi bëjnë që uji shtesë të tërhiqet në zorrë, gjë që mund të bëjë që jashtëqitjet të jenë më të lirshme. Përveç kësaj, bakteret në zorrë i hanë këto sheqerna dhe prodhojnë edhe më shumë gaz.