LGBT+ pushton Tiranën, Yuri Kim i motivon …

Si asnjëherë më parë, pjesëmarrje e lartë në paradën LGBT+. E pranishme edhe Yuri Kim

Foto ilustrim

Paraditen e sotme (e shtunë) është mbajtur parada e komunitetit LGBT+, nën moton “Ne jemi familje”. 

Ndryshe nga paradat e viteve të mëparshme, në këtë event kanë marrë pjesë një numër i konsiderueshëm qytetarësh, aktivistësh dhe anëtarë të trupit diplomatik në Shqipëri. Të pranishme në paradë kanë qenë ambasadorja e SHBA-ve Yuri Kim dhe ambasadorja e Suedisë, Elsa Hastad. 

Në paradë nuk pati përfaqësues të qeverisë dhe opozitës. 

Aktivistja Xheni Karaj tha se kryeministri Rama nuk ka treguar mbështetje publike ndaj këtij komuniteti. 

“Kemi 10 vite që bëjmë parada dhe nuk ka ardhur asnjëherë. Asnjëherë s’ka thënë që është mbështetës i komunitetit LGBTI.”, tha ajo.

Komuniteti LGBT+, mes të tjerash, kërkon ndryshim të legjislacionit për lejimin e martesave mes personave të së njëjtës gjini dhe njohjen e ndryshimit të gjinisë për personat transgjinorë.

Parada ka nisur nga Sheshi Nënë Tereza, më pas është spostuar drejt Kryeministrisë, ku u shpalos flamuri me ngjyrat e ylberit dhe aktivistja Karaj mbajti një fjalim. Pjesëmarrësit kanë parakaluar në zona të ndryshme të Tiranës.