Ambasadori Italian në vendin tonë, Fabrizio Bucci shprehet se ndërkombëtarët nuk duhet të ndërhyjnë në rikthimin e Sali Berishës në krye të Partisë Demokratike.

Në një intervistë për “Mirëmëngjes”, ai tha se janë votuesit ata që vendosin se kush do të jetë lideri i tyre, ndërsa vuri theksin te rëndësia që ka angazhimi i politikanëve të rinj.

“Ne nuk mund të ndërhyjmë, ne si Itali, ne si ndërkombëtarë mendoj, se është mjaft delikate të ndërhysh në dinamikat e brendshme të një partie. Ajo që mund të them, nga një këndvështrim më i përgjithshëm sa i takon opozitës, është se në gjirin e saj ka mjaft politikanë të rinj, të zotë, të aftë, mendoj se ky është pikërisht momenti kur të shohim drejt së ardhmes”, u shpreh ambasadori.

Ky i fundit solli në vëmendje dhe një shprehje të Alcide de Gasperi që ka qenë një ndër kryeministrat e shquar të Italisë.

“Politikanët mendojnë gjithmonë për zgjedhjet e ardhshme. Burrat e shtetit mendojnë për brezat e ardhshëm”, tha ai.

Sa i përket paralajmërimit se edhe Europa do të konsiderojë shpalljen “non grata” të personave të korruptuar, Bucci deklaroi se bëhet fjalë për një institut tipik amerikan dhe vlerësime legjitime të secilit vend.

“Unë besoj se çdo sistem politik duhet të ketë instrumentet dhe mekanizmat e tij për të ndërhyrë në rast se ekzistojnë arsye të qenësishme e të bazuara në prova kur një person ka kryer krim. Magjistratura për këtë shërben. Ajo është e pavarur dhe duhet të ndjekë krimet. Për pjesën tjetër, është e vështirë të japësh gjykime mbi sisteme të tilla”, tha ambasadori.