Kreu i Partisë Demokratike, Sali Berisha, ka zhvilluar sot konferencën e përjavshme me gazetarët.

Berisha u përqendrua në disa çështje ku mbi të gjitha u ndal te ligjit për Amnistinë Fiskale, për të cilin qeveria zhvilloi sot konsultime me bizneset dhe ndërkombëtarët. Berisha e cilësoi amnistinë fiskale një akt me pasoja katastrofale për rendin dhe sigurinë e Shqipërisë.

■ Amnistia fiskale: Akt me pasoja katastrofale

“Problemi i parë që dua të paraqes para jush është amnistia fiskale, një akt me pasoja katastrofale për rendin dhe sigurinë e biznesin në Shqipëri. Duke përshëndetur të gjitha reagimet brenda vendit dhe të huaja, të bëra kundër këtij akti, paralajmëroj gjithashtu qeverinë se amnistia e saj fiskale është një goditje shumë e rëndë për bizneset e ndershme, është një goditje shumë e rëndë për reputacionin e vendit, është një goditje shumë e rëndë për rendin dhe sigurinë në Shqipëri.

Nëse siç ka qëllim kryesor të legalizojë paratë e krimit, pasi ju e keni të qartë se nuk ka shqiptar të ndershëm i cili me punën shtesë që mund të bëjë, me punën e ndershme, qoftë edhe të paregjistruar, të mund të sigurojë 2 milionë euro kursime, është gjithçka që ka vetëm një synim që “çunat” të legalizojnë paratë e krimit dhe ne jemi kategorikisht kundër saj.

Gjithashtu, me këtë proces nuk ka diskutim se Edi Rama dhe grupi i tij do të kenë një taksë veças nga ajo që kanë shpallur për shumicën e këtyre shumave të legalizuara. Ky është një shpërblim që njerëzit që merren me trafiqe kriminale nuk e meritojnë kurrë. Ky është shkelmimi i barazihsë dhe parimeve të drejta të biznesit. Këtyre ua rrit taksat në 23%, atyre u thotë për paratë që keni e keni 7 apo 8%”, u shpreh Berisha.

■ Denoncimi: Këshilltari i Ballukut rriti fitimin e kompanisë së tij 600 herë në 4 muaj

Berisha denoncoi sot se si këshilltari i ministres Belinda Balluku ka rritur fitimet për kompaninë e tij me 600 herë në 4 muaj, duke theksuar se e gjithë kjo dëshmon se sistemi korruptiv i instaluar nga Rama, mund të shndërrohet dita-ditës në realitet.

“Legalizimi i parave të krimit është vetëm një aspekt i veprimtarisë së kësaj qeverie. Ndërkohë, vjedhja vazhdon non stop. Vjedhja shënon, jo në rrafshin sasior, por në rrafshin cilësor, një rekord botëror të padëgjuar dhe të paparë. Këshilltari i ministres të ndërtimeve publike më të kushtueshme në Europë dhe në Botë, Belinda Balluku, i tenderave me 99.99%, një Berberi, rezulton se ka rritur fitimin e kompanisë së tij, duke e shitur dhe blerë atë në 4 muaj, 600 herë. Çfarë dëshmon kjo? Kjo dëshmon se në këtë vend për shkak të sistemit korruptiv të instaluar nga Edi Rama dhe bashkëpunëtorët e tij, për shkak të funksionimit të kësaj qeverie si një grup apo organizatë e mirëfilltë kriminale, çdo lloj imagjinate, çdo lloj projekti që mund të imagjinohet, mund të shndërrohet në realitet pasi ligjet nuk ekzistojnë”, tha Berisha.

■ Protesta: Shqipërinë e pret një skenar si i Sri Lankës

Kryedemokrati nuk përjashtoi protestat në vazhdim. Berisha paralajmëroi se Shqipërinë e pret një skenar i ngjashëm me atë të Sri Lankës.

“Protestat nuk përjashtohen, por kemi punë për të bërë. Do zgjerohemi edhe më shumë. Do të punojmë me komunitetet. Një skenar si i Sri Lankës i pret. Është i njëjti mekanizëm i krijuar. Ish guvernatori i Bankës së Argjentinës paguhet 8 milionë në vit për shkrimet. A e çoi Veliaj në Sri Lanka, apo nga Sri Lanka e solli këtu kjo është për tu hetuar. A e morët vesh që shkoi zonja Hajdari për të dëshmuar dhe SPAK i tha “ik ik, largohu, mos na ngatërro me qeverinë”. Përgjigjen do ta japin qytetarët”, shtoi kryedemokrati.

■ Akuza Ramës: Ka vendosur në krye të PS-së trafikantë e vrasës

Berisha akuzoi Ramën se ka vendosur në krye të Partisë Socialiste trafikantë droge, vrasës dhe njerëz të lidhur me krimin. Sipas kryedemokratit, OFL-ja është lista që Rama i jep policisë për të prerë gjobat.

“Ai i ka vënë në krye të PS-së. Ai ka trafikantë, vrasës, njerëz që kanë qëlluar dhe plagosur të tjerët. A mund t’i besosh atij? Ai i quan burra të mirë ata. po ç’është OFL-ja. OFL-ja është lista që i jep Rama policisë për t’i prerë gjobën. Preku gjë OFL-ja pronat e klanit Xhafa? Unë mund të jap dhe shembuj të tjetër. Ajo nuk ka asnjë tjetër vetëm legalizimin e parave të tyre. Janë me qindra persona që janë arrë me trafiqe kriminale dhe nuk janë të zbuluar. Nuk mund ta bëjë Shqipëria këtë. A ka mundësi që një person me punë të ndershëm të bëjë 2 milionë euro? Kurrë! Ky e ka vetëm me krimin. Është pa asnjë diskutim. Shkaku që nuk na i kanë hapur negociatat ka qenë krimi”, u shpreh kreu i PD-së.

■ Përgjigjja për ‘barin’ e ambasadores Yuri Kim

Berisha i është përgjigjur deklaratës që ambasadorja amerikane në Tiranë bëri dikur për shqiptarët kur tha se “demokratët të mos hanë bar’. Berisha tha se deklarata e Kim nuk u përfill nga qytetarët.

“Shkaqet kryesore të pjesëmarrjes kanë qenë nevoja për një opozitë të vërtetë dhe rritja e çmimeve. Deklarata të cilat synuan të zvogëlojnë mbështetjen ndaj Berishës nuk janë përfillur nga qytetarët shqiptarë. Ambasadori i parë i SHBA-së në Shqipëri ka qenë një burrë shumë i zgjuar dhe me reputacion në vendin e tij. Ai shkruan “shqiptarët janë miqtë tanë, na duan shumë, por ata kanë një gjë, kanë dëshirë që vendimet ti marrin vetë”. Kjo ishte në kohën e Mbretërisë. Mendoj se ambasadori ka qenë një njohës i shkëlqyer i psikologjisë shqiptare”, shtoi Berisha.