Rritja e çmimit të energjisë për ata abonentë që shpenzojnë mbi 800 kWh do të prekë vetëm 4% të konsumatorëve familjarë. Këtë deklaroi ministrja e Infrastrukturës dhe Energjetikës Belinda Balluku një javë më parë, gjatë prezantimit të Paketës së re të Rezistencës Sociale.

Ndërsa 96% e abonentëve familjarë, sipas saj shpenzojnë më pak se 800 kWh, dhe nuk do të preken nga rritja e çmimit të energjisë elektrike.

“Mbi 96% e abonentëve familjarë konsumojnë nën 800 kilovatorë në muaj dhe në tabelën që mund të shfaqet ne kemi bërë edhe një pasqyrim sesi janë të shpërndarë përqindja e konsumit sipas kilovatorëve për familje. Në ndërkohë, kjo 4% e abonentëve familjarë përbën 19% të volumit të konsumit vendas. Çdo kilovatorë mbi 800 kilovatorë, çmimi që do të aplikohet është 35 lekë për kilovatorë, plus 7 lekë tarifat e transmetimit dhe të shpërndarjes, një total prej 42 lekë”, deklaroi Balluku.

Faktoje.al ka siguruar të dhënat e konsumit të energjisë elektrike nga abonentët familjarë për 6-mujorin e parë të vitit.

Konsumi familjar dhe strukturimi i tij sipas familjeve ne Shqipëri, 2022

Shitur klientëve familjarë 6m.I 2022             1.65 TwH

Konsumatorë familjarë gjithsej                     1.1 milionë

Nga të dhënat e ERE për 1.1 milion kontrata të abonentëve familjarë për vitin 2021 rezulton se konsumi vjetor është 2.95 miliardë KWH, apo 2.950 kWh për kontratë (mesatarisht 230 kWh/muaj). Duke marrë parasysh në përllogaritje edhe të dhënat e raporteve të përpunuara nga ERE dhe shifrat e INSTAT arrijmë në përfundimin se:

Rreth 310 mijë abonentë konsumojnë 200 Kwh/muaj (28%);

Rreth 470 mijë abonentë konsumojnë deri në 300 KWh/muaj(43%);

Rreth 235 mijë abonentë llogaritet të konsumojnë midis 300 – 800 KWh/muaj (21%);

Rreth 85 mijë abonente llogaritet të konsumojnë mbi 800 KWh/muaj (8%).

Pra, mbi 800 kWh shpenzohen nga 8% e abonentëve familjarë dhe jo nga 4% sikurse deklaroi ministrja Balluku.

Por një burim pranë Entit Rregullator të Energjisë në kushtet e anonimatit sqaron për Faktoje se shifra e të prekurve pritet të jetë shumë më e lartë në muajt e pikut; dhjetor, janar, shkurt dhe gusht. I njëjti burim shton se gjatë këtyre muajve konsumi i energjisë nga familjarët rritet ndjeshëm ndaj dhe shtrenjtimi i çmimit nga 9.5 lekë në 42 lekë (pa TVSH) do të prekë deri në 18 % të abonentëve familjarë.

Eksperti për ekonominë Klodian Muço pohoi të njëjtën gjë për Faktoje. Muço shprehet se numri i abonentëve familjarë që do të preken është shumë herë më i lartë nga sa deklarohen.

“Autoritetet thonë që janë vetëm 4% e familjeve, por problemi është se çfarë ndodh në periudhën e dimrit. Qeveria ka marrë një mesatare të viteve dhe muajve por është mesatarja e konsumit të dimrit ajo që bën diferencën. Ndaj, në këtë kuptim, përqindja e familjeve të prekura del më shumë se 4%.” – thekson Muço për Faktoje.

Një familje që sot paguan një faturë të energjisë elektrike me vlerë mbi 9120 lekë në muaj, do të preket nga rritja e çmimit. Fatura i përket muajit qershor, çka do të thotë që në muajt e dimrit dhjetor, janar dhe shkurt ku shtrihet edhe ngrohja, fatura do të jetë akoma më e lartë.