Gjithçka për vota / Manja konfirmon amnistinë në burgje: Po bëjmë një studim

E mohoi një muaj më parë, Manja konfirmon amnistinë në burgje: Po bëjmë një studim

Ministri i Drejtësisë, Ulsi Manja, ka bërë të ditur planet e qeverisë për një amnisti të mundshme për të burgosurit.

Në një deklaratë, ku shpalli vendimet e fundit të qeverisë, Manja pohoi se amnistia penale për të burgosurit është traditë e çdo fundviti. Ministri tha se qeveria është ende në faza studimi.

“Në fakt lidhur me amnistinë penale është traditë që çdo fundviti të ketë amnisti penale. E fundit është bërë në vitin 2020. Ne po bëjmë një studim dhe në momentin që do të dalim me një rezultat do t’ju njoftojmë”, u shpreh Manja.

Një muaj më parë, Ministria e Drejtësisë mohoi të kishte ndonjë draft apo projektligj për amnisti në burgje. Në një postim të shkurtër, Ministria tha se nuk ka asnjë konsultim për një amnisti të mundshme.

“Nisur nga interesi publik, i familjarëve dhe i personave në konflikt me ligjin për një amnisti në IEVP e Shqipërisë, Ministria e Drejtësisë sqaron: Deri tani nuk ka asnjë draft, të shkruar, apo në konsultim, për një projekt-ligj mbi një amnisti të mundshme. Nuk ka asnjë grup pune në Ministri të Drejtësisë, apo në Drejtorinë e Përgjithshme të Burgjeve, ngritur për këtë qëllim”, njoftoi asokohe Ministria e Drejtësisë.