Vera e vitit 1994 ishte jashtëzakonisht e ngrohtë për Britaninë e Madhe. Të premten më 24 qershor, një stuhi jashtëzakonisht e fortë goditi juglindjen e Britanisë së Madhe, duke shpërndarë aq shumë polen bari sa shkaktoi një epidemi të papritur të astmës.

Dy ditë më vonë, pas vitesh spekulimesh në rritje, shtypi britanik dha lajmin se Princi Charles kishte zbuluar aksidentalisht tradhtinë e tij ndaj Princeshës Diana gjatë një dokumentari. Kur u pyet nëse i kishte qëndruar besnik gruas së tij, Princi i Uellsit tundi me kokë: “Po absolutisht, – tha ai, – derisa u prish në mënyrë të pakthyeshme.”

Të mërkurën më 29 qershor, në të njëjtën ditë kur programi u transmetua për 13 milionë shikues në të gjithë vendin, Diana doli nga “rrënojat” emocionale për të marrë pjesë në një gala me një fustan aq magjepsës por që prej atëherë njihet si “fustani i hakmarrjes”.

Fustani i zi, me shpatulla jashtë dhe me një dekolte të theksuar i dizajnuar nga Christina Stambolian, nuk ngjante me asgjë të veshur më parë në publik nga Diana.

“Diana donte të dukej “gruaja një milion dollarë”, – tha ish-stilistja e princeshës, Anna Harvey në një dokumentar të vitit 2013 Channel 4 – dhe ajo bëri.”

Të nesërmen në mëngjes, fotot e veshjes së saj u shpërndanë nëpër faqet e para të tabloideve britanike: “Hakmarrja është shik”, shkruante Sun.

Pothuajse tridhjetë vjet më vonë, ende ajo veshje dhe ai momenti mbetet një nga momentet më të papërsëritshme të kulturës pop në histori.

Tashmë ky moment ka të ngjarë të fitojë një audiencë të re falë sezonit të pestë të dramës historike të Netflix “The Crown”, që do të transmetohet më 9 nëntor.

Në një intervistë me Entertainment Weekly, aktorja Elizabeth Debicki e cila do të marrë rolin e Dianës vuri në dukje veshjen si çelës për të kuptuar karakterin e Dianës.

“Kjo provokoi diçka tek unë si aktore, – tha ajo. – Nuk mund ta shpjegoj me të vërtetë. Është shumë e pabesueshme që një fustan të përfaqësonte një moment në histori, ose që jeta e këtij njeriu të përfaqësonte kaq shumë dhe të bëhej kaq ikonike. Ishte një ditë e madhe në shesh xhirim për mua!”