Kryedemokrati Sali Berisha është rikthyer në selinë blu dhe media, pas një shkëputje disa ditore për arsye shëndetësore. Përmes një videojë të shpërndarë në rrjetet sociale, ai tha se “ky vit do të jetë një vit i madh shprese, një vit në të cilin ne do realizojmë projektet tona në interesin tonë dhe të vendit”.

Berisha u ndal edhe te kampi socialist, situatën e të cilit e vlerësoi kauotike. Më tej komentoi edhe vjedhjen e banesës së ish-drejtoreshës së koncesioneve, Alda Klosi.

“Krahu tjetër është një kaos, është sot më i deskrituar se kurrë. Rasti i Rozeta Dobi-t, Alda Klosit është heqja e kapakut të një pusete, në të cilët vërshuan në të katërta anët gjirizet e llumit qeveritar. Në këtë kontekst ajo që bën më përshtypje është se si ka mundësi një njeri që vjen me një apartamet të 40 m2 në Tiranë, lumturohet me 7 të tjera të tilla, pa llogaritur makinat, bizhutë etj, etj.

Por po kaq përshtypje të bën fakti se Edi Rama bëri gjithçka fillimisht të fshihte identitetin e Alda Klosit, pasi këtë kishte bërë në raste të tjera me sukses me ministrat e tij kur ishin vjedhur banesat si Gjiknuri apo flitet për Beqja e Spiropali e të tjerë”, tha Berisha.

Ky i fundit bëri me dije se opozita do të fokusohet te përzgjedhja e emrave për këshillat bashkiakë.

“Sidoqoftë ne sot jemi në një përpjekje të re, në fushatën për zgjedhjen e Këshilltarëve për Komunat dhe Bashkitë. Le të bëjmë gjithçka për të zgjedhur më të mirët në parlamentet lokale dhe nuk ka diskutim se më të mirët gjenden midis jush të dashur të rinj e të reja që ndiqni TikTok-un”, shtoi ai.