Kryedemokrati Sali Berisha ftoi kryeministrin Rama të mbledhë me urgjencë Parlamentin të enjten dhe të votojnë ligjin për rritjen e pagave.

Berisha iu drejtua Ramës duke i thënë se kjo nuk ishte një thirrje për bashkëpunim, por thirrje për të mbështetur shqiptarët.

Kryedemokrati tha se Rama e anuloi vetë ligjin për rritjen e pagës në 900 euro në bashkëpunim me Alibashën, teksa shtoi se nuk ka vend për t’u tallur me shqiptarët.

“E vërteta është se ligjin e bllokoi vetë në Parlament në një marrëveshje të turopshme me Alibashën mbylli Parlamentin. Këtë bëri se ai premtim ishte një mashtrim. Unë jam sot këtu në emër të qytetarëve shqiptarë. Ftoj të mbledhim me urgjencë ditën e enjte Parlamentin dhe të votojmë rritjen e rrogave dhe pensioneve. Bëhu njëherë burrë, qoftë për një moment më të shkurtrin, njeri me ndjenja për qytetarët dhe hajde të votojmë ligjin e rritjes së rrogave. Përgjigju ofertës sonë që ka si synim jo bashkëpunimin me ty, po ka si qëllim mbështetjen e qytetarëve shqiptarë”, deklaroi Berisha.