Mix
Themeluesi i ChatGPT ngre alarmin: Inteligjenca Artificiale do shkaktojë dëme serioze në shoqëri!
Sam Altman paraqiti një propozim në Kongres, në lidhje me krijimin e një agjencie të posaçme që do të japë licenca për krijimin e modeleve në shkallë të gjerë të Inteligjencës Artificiale
Sam Altman
Inteligjenca Artificiale është bërë temë debati dhe polemikash. Vetë shpikësi i ChatGPT, Sam Altman, ka shfaqur shqetësim mbi Inteligjencën Artificiale, duke thënë se kjo teknologji do të shkaktojë dëme serioze në shoqëri.
“Një nga frikërat e mia më të mëdha”, tha ai duke iu drejtuar një nënkomiteti të posaçëm të Kongresit të SHBA , “është se kjo teknologji do të shkaktojë dëme serioze në shoqëri.”
Në fakt, CEO i OpenAI, një kompani start-up me qendër në San Francisko, të cilës i përket edhe ChatGPT, tha se duhet bashkëpunim me qeverinë për të parandaluar që kjo të ndodhë.
“Nëse Inteligjenca Artificiale merr rrugën e gabuar, atëherë të gjithë jemi bashkëpunëtorë. Ne duhet të veprojmë së bashku me qeverinë për të parandaluar që kjo të ndodhë”.
Seanca dëgjimore e 38-vjeçarit Sam Altman në nënkomisionin e krijuar posaçërisht për ekzaminimin e Inteligjencës Artificiale të Kongresit u mbajt të martën, më 16 maj 2023, raporton “NewsBomb gr”.
Sam Altman theksoi se kompania e tij, OpenAI, “mund të jetë shkaku i eliminimit të disa vendeve të punës, por do të krijojë shumë të reja. Në fund të fundit, Altman vuri në dukje se AI është një mjet, jo një qenie autonome. Dhe përtej kësaj, Inteligjenca Artificiale ka potencialin për të përmirësuar pothuajse të gjitha aspektet e jetës sonë, për të ofruar zgjidhje për sfidat më të mëdha të njerëzimit, si ndryshimi i klimës, trajtimi i kancerit, etj”.
Është gjithashtu e rëndësishme të përmendet se Sam Altman paraqiti një propozim në Kongres, në lidhje me krijimin e një agjencie të posaçme që do të japë licenca për krijimin e modeleve në shkallë të gjerë të Inteligjencës Artificiale. Ky shërbim do të jetë në gjendje të kontrollojë, nëse rregullat e sigurisë po ndiqen dhe të mbikëqyrë testet që do të duhet të kalojnë modelet dixhitale përpara se të lançohen në publik për përdorim.
