Agron Shehaj e ka quajtur farsë vendimin e kryeministrit Rama për të rritur e rrogat e administratës por jo të deputetëve dhe minsitrave. Votimin e tij kundër, ndryshe nga kolegët e tij të së djathtës, Shehaj e argumentoi duke thënë se kjo është tallje që i bëhet deputetëve nga Rama.

Në mbledhjen e komisionit të ligjeve, ku deputetët e mazhorancës dhe opozitës bashkuan sot votat për të rritur rrogat e tyre, pasi Rama tha se nëse duan mund t’i rrisin vetë, Agron Shehaj e quajti ofenduese.

Para votimi, ai i bëri thirrje deputetëve të mos bëhen pjesë e kësaj farse.

“I ftoj kolegët këtu të mos bëhen pjesë e kësaj farse. Do të ishte realisht ofenduese për të gjithë ne, që ne të rrisim rrogat tona. Unë nuk po them që deputetëve nuk iu takon që si gjithë të tjerët të përfitojnë nga rritja e rrogave. Nuk po them këtë. Por ne nuk mund të bëhemi pjesë e kësaj farse. Nuk mund të tallet kryeministri dhe qeveria në këtë farë mënyre me ne. Të na hedhi aty një projektligj ku thotë, ne do ja rrisim të gjithëve, se për popullin, nuk e bëjmë për vete. Ju po deshët rritjani vetes. Merreni ju këtë turp përsipër. T’ja rrisni vetes. Kjo është farsa e këtij kryeministri, e kësaj qeverie.” – u shpreh Shehaj.

Votimi u realizua dhe vetëm Shehaj votoi kundër. Deputetët e tjerë të opozitës bashkuan votat me socialistët për të rritur rrogat e tyre meqë Rama nuk mori vendim për t’ia rritur. Sikurse pritej, ky bashkim votash shkaktoi debat në opinionin publik.