Ndryshe nga fushata zgjedhore, ku Rama premtoi rritje pagash dhe lehtësira për biznese e individë, këtë herë kryeministri kaloi të rritja e çmimit të energjisë elektrike.

Nga Kuvendi, Rama paralajmëroi rritjen e çmimit të energjisë elektrike, kur tha se me ardhjen e verës do të rihapet diskutimi për vendosjen e fashës. Sipas Ramës, në faturën e energjisë elektrike nuk përcaktohet vlera reale e çmimit, dhe me ardhjen e verës rritet konsumi nga familjet, çka e bën të detyrueshme sipas tij rishikimit e fashës.

“Po ju kujtoj të gjithëve atyre që na ndjekin se sot vazhdon që në faturën e energjisë elektrike për të gjitha familjet dhe biznesin e vogël dhe pjesën dërrmuese të biznesit, të jetë dora e qeverisë. Ajo që paguajnë familjet, nuk është vlera reale e faturës. Familjet shqiptare dhe biznesi i vogël paguan ekzaktësisht sa paguante me çmimin përpara krizës. Ka rënë çmimi i energjisë në tregun ndërkombëtar, por nuk është kthyer aty ku ishte.

Qeveria ka pasur dhe ka vullnetin e plotë që të paguaj. Me ardhjen verës konsumi do të rritet dhe do të duhet të rihapim diskutimin e fashës. Sot për sot jemi në këto kushte që vazhdojmë të paguajnë. Nëse do të ishim duke pasur një ekonomi lënguese, ku merret një shifër aty dhe një shifër atje si ajo përralla e asaj species që donte të zbukurohej, atëherë sigurisht që kjo rritje pagash nuk mund të bëhet. Ekonomia është rritur, ndryshe nga çfarë është thënë”, tha Rama.