Temporal
Shefqet Kastrati dhe aritmetika 7×7=42 te rruga e kombit !
“Boom-i” i turistëve nuk përputhet me tarifat që ka mbledhur Rruga e Kombit
NGA
Ola Xama
Të dhënat zyrtare të Ministrisë së Infrastrukturës dhe Energjisë të siguruara nga MyAlbania.com.al tregojnë se gjatë vitit të shkuar të ardhurat nga tarifa në rrugën Durrës – Kukës ishin 13.08 milion euro. Fluksi i qarkullimit në këtë autostradë ka performancë të mirë nëse krahasohet me planin e kontratës koncesionare, por me rënie me periudhat e tjera.
Të ardhurat nga tarifa të deklaruara nga koncesioari i rrugës gjatë vitit 2022 kanë arritur të kalojnë vetëm dy vite të vështirë: vitin e pandemisë 2020 dhe 2018-n, kohë kur nisi zbatimi i kontratës koncesionare dhe tarifimi u aplikua vetëm për 4 muaj.
Vitin e shkuar koncesionari ka mbledhur 1.4 milion euro më pak se në vitin 2021 dhe 2 milion euro më pak se në 2019-n, periudhë që pati një sezon të mirë turistik.
Numri më i lartë i turistëve të huaj në Shqipëri është nga Kosova. Historikisht fluksi i vizitorëve nga ky shtet ka zënë mesatarisht 40% të volumit të vizitorëve. Të dhënat zyrtare të Institutit të Statistikave raportojnë se gjatë vitit 2019 në rrugën e Kombit kanë hyrë 2.246.540 individë me shtetësi nga Kosova.
Gjatë vitit 2020 numri i turistëve që hynë nga vendi fqinjë ishte 1.379.360, një rënie me 38.6%. Kjo shifër reflektohet dhe te mbledhja e taksës në rrugën e Kombit, ku të ardhurat nga tarifa u ulën me 2.8 milion euro. Në vitin 2021 në territorin shqiptar kanë hyrë 2.640.447 shtetas kosovarë, 394 mijë më shumë, por të ardhurat nga taksa e rrugës rezultojnë 630 mijë euro më pak.
Shifrat që kanë mospërputhjen më të madhe janë ato të vitit 2022. Vitin e shkuar Shqipëria pati një “boom” vizitorësh të huaj duke kapur numrin më të lartë historik 7.5 milion. Nga këta sipas INSTAT, 3.209.123 janë vizitorë që kanë hyrë nga shteti i Kosovës. Krahasuar me vitin 2019, numri i vizitorëve është 962.583 më i lartë dhe nëse llogarit dhe kthimin, qarkullimi i vizitorëve kosovarë (hyrjet +daljet) është rritur me 1.9 milion njerëz më shumë se në 2019-n. Megjithatë të ardhurat nga taksa e rrugës janë raportuar 2 milion e 11 mijë euro më pak se në ky vit.
Të dhënat e Telepass-it, ku janë të regjistruar abonentët që përfitojnë nga skema e uljes së tarifës tregojnë se vitin e shkuar janë paguar 624 mijë euro. Kjo vlerë nuk ka peshë në ndryshimin e të ardhurave nga tarifa, pasi zë vetëm 5% të totalit të të ardhurave.
Që nga viti 2019 dhe deri në vitin 2022, performanca e pagesës së tarifës në rrugën e Kombit rezulton mbi skenarin optimist të parashikuar në kontratë. Kontrata detyron që çdo e ardhur që merret shtesë mbi pragun e lejuar, të ndahet përgjysëm mes shtetit dhe kompanisë koncesionare. Deri tani koncesionari ka realizuar 15.2 milion euro më shumë se kufiri për ndarjen e të ardhurave nga trafiku në 4 vitet e koncesionit 2019-2022, ku 7.6 milion euro janë derdhur në buxhetin e shtetit.
Mospërputhja e shifrave mund të shpejgohet vetëm me 3 mundësi: ose konçesionari ka nëndeklaruar të ardhurat që të mos ndajë paratë me shtetin, ose INSTAT nuk ka publikuar të dhënat e sakta për të propaganduar shifra të larta të fluksit të turistëve, ose shtetasit nga Kosova të kenë hyrë me traget!
Ky artikull është ekskluzivitet i “My Albania“
