Kanë filluar xhirimet për filmin biografik të Maria Callas, sopranos më të njohur të shekullit XX, shpesh e përfolur edhe për origjinën shqiptare. Në fimin me titull “Maria”, do të luajë aktorja e famshme e Hollivudit, Angelina Jolie, ndërsa në internet janë shfaqur fotot e para të transformimit të aktores, duke hyrë brenda personazhit të saj.

“Jam jashtëzakonisht e emocionuar për të filluar prodhimin e “Maria”, i cili shpresoj se do të sjellë jetën dhe veprën e mrekullueshme të Maria Callas për publikun në mbarë botën, falë skenarit të mrekullueshëm të Steven Knight, punës së të gjithë kastit dhe ekipit, dhe veçanërisht punës brilante të Angelinës”, tha regjisori i filmit.

Bazuar në rrëfime të vërteta, filmi “Maria” shpalos historinë e trazuar, të bukur dhe tragjike të jetës së sopranos, si dhe fokusohet në ditët e saj të fundit në Paris në vitet 1970. Skenari, i cili përfundoi përpara grevës së WGA, është shkruar nga Steven Knight, krijues i serialit “Peaky Blinders”.

Raportimet thonë se xhirimet që tashmë kanë nisur do të zgjasin 8 javë dhe do të zhvillohen në Paris, Greqi, Budapest dhe Milano.

Në film luajnë edhe Pierfrancesco Favino, Alba Rohrwacher dhe Cody Schmidt-McPhee.

Sipas Variety, aktori turk dhe fituesi i Emmy-t, Haluk Bilginer do të luajë Aristotle Onassis, ndërsa Valeria Golino do të interpretojë motrën e madhe të Callas, Hyacinthi, e njohur edhe si Tzaki.