Mega-donatorja republikane dhe miliarderja e kazinove Miriam Adelson planifikon të ndihmojë në financimin e një organizate të madhe për të mbështetur Donald Trump-in, ndërsa ai kërkon të mbyllë hendekun e tij financiar me presidentin Joe Biden.

Adelson po planifikon të luajë një rol të madh në financimin e “Mbojmë Amerikën”, një organizatë pro-Trump e themeluar gjatë fushatës së rizgjedhjes së ish-presidentit në zgjedhjet e vitit 2020. Grupi tani po rikonstituohet për të ndihmuar kandidaturën e Trump për zgjedhjet e 5 nëntorit 2024, sipas një personi me njohuri të drejtpërdrejta për planet e saj, të cilit iu dha anonimiteti për të folur lirshëm.

Se sa është shuma që do dhurojë Adelson për organizatën nuk është ende e qartë, megjithëse personi i njohur me planet e saj tha se grupi priste të shpenzonte më shumë se sa bëri katër vjet më parë kur Adelson dhe burri i saj i ndjerë, Sheldon, dhuruan 90 milionë dollarë për “Mbrojmë Amerikën”. Fondet e tyre përbënin rreth 85 për qind të asaj që organizata mblodhi në total.

Adelson, e cila është aksionere kryesore e “Las Vegas Sands” dhe që gjithashtu ka shumicën e aksioneve në “Dallas Mavericks” me dhëndrin e saj, ka një vlerë neto prej 33.3 miliardë dollarësh, sipas Indeksit të Miliarderëve të Bloomberg.

Investimi i pritshëm i Adelson përfaqëson një nxitje të madhe për Trump-in, i cili e ka kultivuar atë si pjesë e një përpjekjeje më të gjerë për të sjellë donatorë të mëdhenj të republikanëve në mbështetje të tij.

Ish-presidenti është takuar me Adelson disa herë muajt e fundit dhe gjithashtu ka folur me të në telefon, sipas një personi tjetër të njohur me bisedimet. Adelson vendosi të largohej nga zgjedhjet paraprake republikane, pavarësisht se u josh nga një numër kandidatësh.

Trump ka kërkuar të plotësojë një hendek të konsiderueshëm në mbledhjen e fondeve me Biden dhe po mbështetet te donatorët e mëdhenj për ndihmë. Deri në fund të prillit, llogaria e fushatës së Biden-it kishte 84 milionë dollarë, krahasuar me 49 milionë dollarë për Trump.

Marrëdhënia e Adelson-it me Trumpin shtrihet shumë vite më parë. Miriam dhe Sheldon u ulën në tribunë në përurimin e Trump në vitin 2017, dhe në vitin 2018 Trump i dha Miriam, një mjeke e specializuar në rehabilitimin e varësisë nga droga, Medaljen Presidenciale të Lirisë. Në një reportazh të Politico të vitit 2021 për veprimtarinë politike të Miriam Adelson, Trump e vlerësoi atë si një “grua të mrekullueshme që burri i saj e donte shumë dhe, në të njëjtën kohë, e respektonte për inteligjencën e saj të madhe”.

Dave Carney, një strateg i vjetër i Partisë Republikane që këshillon guvernatorin e Teksasit Greg Abbott dhe ka punuar më parë për një numër kandidatësh presidencialë, do drejtojë organizatën. Carney është i njohur për taktikat e tij agresive politike. Guvernatori i Teksasit, Dan Patrick, një aleat i ngushtë i Trump, i cili mori pjesë në gjyqin e javës së kaluar ndaj Trump-it, e vlerësoi Carney-n në një deklaratë si “një asset me përvojë, me njohuri të thella në drejtimin e garave të mëdha, në qindra milionë dollarë”.

Gjatë fushatës 2020, “Mbrojmë Amerikën” u mbikëqyr nga Chris LaCivita. LaCivita tani po shërben si menaxher i bashkëfushatës së Trump dhe nuk është më aktiv me organizatën.

“Joe Biden po shkatërron vendin tonë me çmime të larta, kufijtë e hapur dhe dobësi në politikën e jashtme. Ne do bëjmë gjithçka që mundemi për ta ndaluar atë dhe për ta kthyer presidentin Trump në Shtëpinë e Bardhë për ta vënë Amerikën në radhë të parë edhe një herë”, tha Carney në një deklaratë.

Ata që janë të njohur me planet e “Mbrojmë Amerikën” thonë se grupi pritet të mbledhë para nga donatorë të tjerë përveç Adelson. Ndërsa çifti Adelson i dha grupit shumicën dërrmuese të fondeve të tij në vitin 2020, ai gjithashtu tërhoqi çeqe nga donatorë të tjerë të mëdhenj të republikanëve, duke përfshirë investitorin Warren Stephens, biznesmenin Ronald Cameron dhe ekzekutiven e ndërtimit Diane Hendricks. Në total, organizata tërhoqi kontribute nga gati njëqind njerëz, sipas të dhënave të financimit të fushatës.

Ashtu si bashkëshorti i saj i ndjerë Sheldon, Adelson e lindur në Tel Aviv ka qenë prej kohësh një mbështetëse e hapur e Izraelit. Adelson, e cila është botuese e gazetës “Israel Hayom”, e krahasoi sulmin e 7 tetorit ndaj Izraelit me sulmet terroriste në SHBA-së më 11 shtator 2001 në një fjalim në fund të vitit të kaluar.

“Mbrojmë Amerikën” do jetë një nga disa organizatat pro-Trump. Mjeti kryesor ka qenë MAGA Inc., një organizatë në të cilën Trump është shfaqur në ngjarjet e mbledhjes së fondeve dhe e cila mbikëqyret nga aleati i Trump, Taylor Budoëich.

Një organizatë e theneluar së fundmi është “Right for America”, e cila financohet nga miku i Trump dhe ish-ekzekutivi i “Marvel Entertainment”, Ike Perlmutter. Guvernatori i Floridës, Ron DeSantis, një ish-kundërshtar kryesor i Trump, i cili tani po rivendos marrëdhëniet e tij me ish-presidentin, ka ndihmuar në mbledhjen e parave për “Right for America”.

 Politico