Në këto ditë, Angelina Jolie është Maria Callas në filmin Maria të Pablo Larraín, që eksploron ditët e fundit të sopranos legjendare. Aktorja, e cila ka ushtruar për më shumë se gjashtë muaj për të interpretuar këngëtaren, foli për Journal du Dimanche rreth rolit të saj të vështirë. Kur u pyet se si u identifikua me Callas, e cila humbi zërin përpara se të vdiste në moshën pesëdhjetë e tre vjeçare, aktorja 49-vjeçare ofroi një reflektim prekës: “Jam pothuajse 50 vjeç. Nëna ime u diagnostikua me kancer terminal në moshën 48 vjeçare. Gjyshja ime vdiq nga e njëjta sëmundje në moshën 45 vjeçare. Nuk kam menduar kurrë se kam një të ardhme të garantuar, kam qenë gjithmonë e vetëdijshme për brishtësinë e jetës.”

Kjo vetëdije e shtyu atë të merrte vendime drastike për të ruajtur shëndetin e saj: pasi zbuloi se ishte bartëse e një gjeni që rriste rrezikun për kancer, ajo iu nënshtrua një mastektomie në vitin 2013 dhe më pas, në vitin 2015, i hoqi vezoret. “Kam pasur probleme serioze shëndetësore. E konsideroj veten të huazuar në Tokë,” tha aktorja në intervistën e re. Ajo shtoi se kur mendon për vdekjen, shqetësimet e saj më të mëdha janë për gjashtë fëmijët e saj: Maddox, Pax, Zahara, Shiloh dhe binjakët Vivienne dhe Knox. “Ndonjëherë mendoj për vdekjen. Dhe ajo që më tmerron është se do lë fëmijët e mi vetëm. Nuk mund ta pranoj.”

Pas divorcit të saj të turbullt nga Brad Pitt, Jolie, e cila fitoi kujdestarinë ekskluzive të gjashtë fëmijëve, ka thënë shumë herë gjatë viteve: “Jam një nënë që i dua fëmijët e mi. Sfida më e madhe, gjëja më e rëndësishme për mua, janë fëmijët e mi. Ata janë miqtë e mi më të afërt, njerëzit më të afërt me mua dhe jetën time. Jemi shtatë njerëz shumë të ndryshëm, dhe kjo është pikërisht fuqia jonë.” Nuk është rastësi që aktorja, e cila është beqare (të paktën zyrtarisht) prej vitesh, shfaqet gjithnjë e më shpesh në tapetin e kuq me fëmijët e saj.