Të zhgënjehesh nga Berisha në vitin 2025?

Dhe nëse dikush priste që ai do të luante ndryshe këtë herë, atëherë problemi nuk është Berisha – problemi është naiviteti i tyre.

Koment nga ARDIT HAXHIJA

Të gjithë ata që sot ndihen të zhgënjyer nga Sali Berisha dhe listat e kandidatëve për deputetë, duhet ta pranojnë një të vërtetë të thjeshtë: zhgënjimi vjen kur ke pritur diçka ndryshe. Por çfarë pritej ndryshe nga ai që për 30 vite ka ndërtuar politikën e tij mbi besnikërinë personale dhe jo mbi parimet?

Berisha e di më mirë se kushdo që nuk ka asnjë shans për të fituar zgjedhjet. Kjo nuk është as surprizë dhe as ndonjë zbulim i madh. Plani i tij nuk ka të bëjë me fitoren, por me mbijetesën. Ai nuk po përpiqet të rikthejë opozitën në pushtet, por të ruajë kontrollin mbi grupin e tij të ngushtë, një grup që është gati ta ndjekë në çdo skenar, sado ekstrem qoftë ai.

Pikërisht për këtë arsye, ai ka larguar nga listat çdo figurë që mund të shfaqte qoftë edhe hijen më të vogël të pavarësisë. Dikur, shumë prej këtyre njerëzve besuan se Berisha do t’i trajtonte ndryshe, se do t’u jepte hapësirë, se nuk do t’i flijonte për interesin e tij. Sot, ata e kanë kuptuar të vërtetën, por shumë vonë.

Ironia më e madhe është se disa prej atyre që sot ankohen për përjashtimet ishin të njëjtët që dikur sulmonin këdo që kritikonte Berishën. Ata që talleshin me idenë se vetëm Lulzim Basha mund të sillte rotacionin, sot janë përjashtuar nga loja dhe kanë mbetur me duart bosh. Berisha nuk i fal, nuk ndan pushtet dhe nuk pranon asnjë zë ndryshe.

Në politikën e tij, besnikëria e verbër vlen më shumë se çdo votë. Dhe nëse dikush priste që ai do të luante ndryshe këtë herë, atëherë problemi nuk është Berisha – problemi është naiviteti i tyre.

/Podiumi.com media online prej vitit 2016