Aktualitet
Ylli:Top modele. Shala: Jam burrneshë!
Deputeti i Partisë Socialiste, Fidel Ylli është përfshirë në polemika këtë të mërkurë me atleten Klodiana Shala, ishdrejtuese e Agjencisë së Shërbimit të Sporteve. Ai e akuzoi për përvetësim të një fondi 520 milionë lekësh të dhëna nga qeveria “Berisha”. Ylli i bëri akuzat nga studio e emisionit “Procesi Sportiv” në “Top Channel”, ku tha se ky fond u shpërdorua ndërsa dihej që stadiumi “Qemal Stafa” do të prishej.
“Në investimet në sport jemi 20% më pak se Maqedonia, 30% më pak se vendet ballkanike. E kuptoni që kemi ngelur me pallatin e sportit të Petrit Dumes, një hangar avionësh dhe nuk është bërë asnjë. Dhe po të them unë abuzimet që ka bërë qeveria ‘Berisha’ në këto vite, ju do të habiteni. I kam këtu me fakte dhe argumente. Si rasti kur i jepnin para’ kësaj topmodeles Klodiana Shalës, drejtoreshë e qendrës. 520 milionë lekë, ndërkohë që kishte dalë që stadiumi “Qemal Stafa” që do të prishej. Dhe hodhën 500 milionë lekë për të rregulluar poshtë stadiumit dy palestra. A e kuptoni se çfarë kanë bëra këta? Jua jap me fakte dhe me argumente”,- deklaroi deputeti Ylli.
Por në një reagim për gazetën “Panorama Sport”, Shala sfidon Yllin që të nxjerrë faktet në lidhje me akuzën.
“Le t’i nxjerrë faktet nëse i ka dhe le të më ndjekë penalisht. Nuk e di çfarë ka ngatërruar ai, pasi nuk e kam ndjekur emisionin. Ne si Agjenci e Sportit kemi qëndruar vetëm një muaj te stadiumi ‘Qemal Stafa’ dhe më pas kemi kaluar te kompleksi ‘Dinamo’ për tre vite. Nëse ka fakte, le t’i nxjerrë. Po t’i ketë firmosur Fideli, nuk e di unë përse e ka fjalën”.
Epitetin e deputetit të PS-së “topmodele” e merr si kompliment.
“Besoj se e ka pasur për kompliment atë. Nëse do ta kishte ndryshe, mund të ma thoshte ballë për ballë, pasi i kam qejf këto takimet. Unë jam femër me fustan, por jam burrneshë. Nuk e di se çfarë ka dashur të tregojë me këtë! Tani është deputet dhe i lejohet të thotë çdo gjë. Megjithatë, në fund të ditës, nuk më intereson shumë se çfarë thotë ai për mua” – ka thënë Shala për “Panorama Sport”.
Duhet të jeni i kyçur në mënyrë që të mund të lini një koment Kyçu