Tregtia botërore e armëve, SHBA në vend të parë

Instituti i Kërkimeve për Paqen, SIPRI, ka ofruar të dhëna të reja mbi tregtinë ndërkombëtare të armëve, ku eksportuesi më i madh, Amerika, rezulton të jetë shumë përpara Rusisë, ndërsa blerësit kryesorë janë në Azi dhe Lindjen e Mesme.

Përpara më shumë se një jave, në Konferencën e Mynihut, kryeministri rus Dmitry Medvedev përcolli bindjen e tij se bota po përjeton një luftë të re të ftohtë. Në pjesë të ndryshme të globit ndërkohë ka konflikte të vërteta, siç është ai në Ukrainë dhe ato në Lindjen e Mesme. Në Azinë lindore sjellja agresive e Kinës ka zhytur në alarm fqinjët; në Azine jugore marrëdhëniet mes rivalëve të vjetër, Indisë dhe Pakistanit, mbeten si gjithmonë tmerrësisht të tensionuara.

Në të njëjtën kohë, ka një pasiguri ndërkombëtare në rritje për shkak të kërcënimit terrorist. E nga sa tregojnë qartë të dhënat e institutit me seli në Stokholm, gjendja tepër e tensionuar e sigurisë globale pasqyrohet fare mirë tek lulëzimi i tregtisë së armëve.
Rezultati i kërkimeve të ekspertëve të SIPRIT-t, që për arsye objektive i grupojnë transfertat botërore të armëve në periudha 5-vjeçare, tregojnë se gjatë këtyre 5 viteve të fundit në mbarë botën janë eksportuar 14% më shumë armë se në 5 vitet përpara tyre. Shifrat flasin qartë, sipas SIPRI-t: sa më shumë kriza të ketë, aq më shumë armë do të jenë në qarkullim. Shumica dërrmuese e armëve të shitura në këtë periudhë kanë shkuar në Azi dhe në Lindjen e Mesme.

Sipas institutit të Stokholmit, në zonën mes Gjirit Persik dhe Bosforit importet e armatimeve të rënda rezultojnë të jenë rritur me 61%. India është e para në listën e importuesve, Arabia Saudite e dyta, ndërsa Turqia vjen e gjashta. Më pak armë shiten në Afrikë, kjo për shkak të varfërisë.