Vitaminat që duhet dhe nuk duhet të merren çdo ditë

“Autoritetet e Institutit të Shëndetit publik bëjnë me dije se: vitaminat klasifikohen në të tretshme në yndyrë dhe të tretshme në ujë. Kjo ndarje përcakton edhe kushtin se sa shpesh duhet të merren vitaminat”, shkruan Dita.

Vitamina të tretshme në yndyrë janë vitaminat A, D, E, K, të cilat kanë këto karakteristika: “Nuk duhet të merren përditë sepse trupi i depoziton këto vitamina. Gjithashtu këto vitamina nuk preken nga përgatitja, gatimi, apo ruajtja e ushqimeve dhe nuk eskretohen lehtë (çka do të thotë se mund të mbeten në trup nëse merren me shumicë).

Vitamina të tretshme në ujë janë vitaminat B-Kompleks, vitamina C, të cilat kanë këto karakteristika: “Duhet të merren përditë sepse trupi nuk i depoziton këto vitamina, shkatërrohen nga nxehtësia, ajri, ose uji kur lihen në ujë, çka do të thotë se ato eskretohen lehtësisht nga veshkat në urinë dhe nuk përbëjnë problem.

Vitamina D

Kjo vitaminë e ndihmon trupin për të thithur kalciumin, përmirëson formimin e kockave, ndihmon në mbajtjen e nivelit të kalciumit në gjak dhe mangësia në marrjet e saj mund të shkaktojë zbutjen dhe deformimin e kockave me pasojë rakitin tek fëmijët.

Vitamina A

Po kështu Vitamina A ndihmon në zhvillimin e syve, të lëkurës dhe membranave mukoze, në parandalimin e infeksioneve dhe ndihmon zhvillimin e kockave dhe dhëmbëve e për rrjedhojë mangësia në marrjet e saj mund të shkaktojë dëmtime në sy mund të çojnë në verbim natën, mundësi më e madhe për infeksione dhe lëkurë e thatë.

Vitamina C

Vitamina C është një nga përbërësit kryesorë të kolagjenit, e cila është proteina kryesore e indit lidhor që kryen lidhjen mes qelizave të ndryshme. Vitamina C është shumë e rëndësishme në parandalimin dhe trajtimin e infeksioneve, sëmundjeve akute të zemrës dhe enëve të gjakut, disa llojeve të kancerit, ndihmon në uljen e kolesterolit, por ndihmon edhe në luftën kundër plakjes.

Grupi vitaminave B

Ky grup vitaminash ndikon në zbërthimin e karbohidrateve, yndyrave dhe proteinave dhe energjisë në organizëm.

Vitamina B9, ose acidi folik dhe folatet, janë të nevojshme tek fëmijët për: ndarjen e qelizave, rritjen dhe zhvillimin e qelizave të shëndetshme të gjakut, formimin e materialit gjenetik (acidit nukleik) brenda çdo qelize, pra merr pjesë në procesin e rritjes dhe riprodhimit të qelizave të trupit, vepron si enzimë bashkë me vitaminën B12 në shpërbërjen dhe përdorimin e proteinave.

Acidi folik është veçanërisht i nevojshëm për një funksionim normal të trurit, duke u përqendruar në lëngun spinal dhe jashtëqelizor dhe parandalon keqformimet si: spina bifida tek fetusi që në periudhën e hershme të konceptimit.