Irisi në “botën” e portaleve

Koment nga: Bilbil Beqiri

Portalet i kanë bërë mirë demokracise dhe këtë e kam bindje.

Në një mënyrë apo në një tjetër e vërteta sot del në shesh. Jo më kot vendet me drejtim autokratik u shpallin luftë fillimisht medias ( portaleve ). Por kjo e mirë e ka edhe të keqen brenda. E keqja vjen nga fenomeni tashmë global i asaj që quhet lajmi i rremë, ose fake news. Pra njerëzit lexojnë dhe besojnë diçka që s’ka ndodhur kurrë, dhe kjo në një këndvështrim duket e tmerrshme.

Përhapësit ose promotorët më të mëdhenj sot të lajmit të rremë, pra fake news-it, janë portalet.

Çdo profesor apo filozof i kohës tonë është pyetur mbi fenomenin fake news dhe pergjigjet kuptohet kane qenë nga më të ndryshmet. Por unë për vete zgjedh, dhe shoh si zgjidhje vetëm përgjigjen e profesorit, filozofit dhe aktivistit amerikan Noam Chomsky, i cili thotë se e vetmja mënyrë për t’i bërë ballë lajmit të rremë është shkollimi dhe edukimi.

Një njeri i shkolluar dhe i mirë edukuar nuk është kurrë pre e lehtë e portaleve apo e lajmeve dashakeqe. Ata dinë ta dallojnë një lajm që në titull, dhe nuk dhurojnë klikime me shumë lehtësi.

Por portalet kanë edhe një aspekt tjeter, atë të promovimit të lajmit sensacional. Që do të thotë se gjëja e thënë është e vërtetë, por është një gjë që nxit ose provokon. Pra portalet promovojnë provokimin, sepse provokimi sjell klikime, dhe pas klikut fshihet një person.

E tillë ishte ngjarja me pedagogen e gazetarisë Iris Luarasi. Nëse s’do të ishin portalet që presin në pritë si macja miun, ato që ajo tha për notat ngelëse të disa gazetarëve të famshëm do të kishin kaluar pa u vënë re.

Pra në këtë realitet të ri, lind nevoja të jemi më të kujdesshëm, përveç rastit kur me dashje duam të nxisim ndonjë provokim.

Në kohën e portaleve duhet të kesh shumë kujdes se fjala merr dhenë dhe rritet si orteku  i dëborës, dhe nuk ke fuqinë ta ndalosh dot.

Për këtë fenomen ka dy zgjidhje, e para, kujdesi që duhet të tregojë vetë personi, dhe zgjidhja e dytë por më afatgjatë, është ajo e edukimit dhe e shkollimit të njerëzve. Sepse përndryshe portalet ashtu si piranjat nuk duan t’ia dinë./Podiumi.com