Kritike
Artan Fuga: Kjo pandemi, na gjeti me një shtet portativ
Fuga tha se një shtet i amputuar nuk e përballon dot një situatë të tillë të jashtëzakonshme dhe kjo ka bërë që të zgjerohet pushteti i personalizuar nga Rama.
Akademiku Artan Fuga thotë se pandemia ka krijuar perceptimin se kryeministri i ka në dorë të gjitha. Sipas tij, kjo ka ardhur për shkak të funksionimi të pjesshëm të shtetit. Në një intervistë për gazetarin Nertil Agalliu në TvT, Fuga tha se një shtet i amputuar nuk e përballon dot një situatë të tillë të jashtëzakonshme dhe kjo ka bërë që të zgjerohet pushteti i personalizuar nga Rama.
“Ky pushtet i personalizuar rritet sepse na gjeti me një shtet portativ, provizor. Pa Gjykatë të Lartë, Parlamenti gjysmë ilegjitim, gjyqësori në atë strukturimin që është, pushteti vendor me problemet e legjitimitetit të 30 qershorit. Asnjëherë nuk luhet me shtetin. Shtet provizor me idenë “hë se do ta zgjidhim”, nuk ka. Ky shtet i amputuar nuk e përballon dot. Te ne kjo ka ndodhur. Po të ishin këto struktura, edhe një pushtet i personalizuar nuk do të kishte këtë lloj perceptimi se të gjitha i ka në dorë kryeministri”, tha ai.
