Shqipëria mbetet ende një thesar i pazbuluar nga të huajt, dhe nuk e kemi fjalën vetëm për bukuritë e mëdha natyrore, por edhe për ushqimin dhe recetat tradicionale shqiptare që duhet t’i provojë me patjetër një i huaj në vendin tonë.

Por cilat janë gatimet tradicionale që duhet t’i provojë një turist kur vjen në Shqipëri?

1.Tavë Kosi
Tepër e shijshme dhe e ushqyeshme, Tava e Kosit jo më kot renditet në vend të parë si një ndër gatimet tradicionale që ka tërhequr vëmendjen e turistëve të huaj. Tipike nga Elbasani, kjo tavë e veçantë,  ka fituar edhe çmim të parë në Itali, si gatimi më i mirë mes 26 gatimeve nga shtete të tjera.

2.Byreku
Gatimi i brumërave mbetet një specialitet më vete i trojeve shqiptare.  Çdo vend i Ballkanit i jep këtij gatimi nuanca të rëndësishme të traditës vendase. I tillë është rasti i Shqipërisë që gatimin e byrekut e ka përvetësuar dhe përditësuar mrekullisht. Ne ju sugjerojmë që të provoni byrekun me gjizë  i pjekur me mjeshtëri, që do t’ju bëjë të lëpini gishtat.

3.Speca të mbushur
Mbetet një nga tavat më të kërkuara shqiptare me bazë perimesh të shijshme vendase. Specat e mbushur jo vetëm që do t’ju pëlqejnë shumë por do t’i kërkoni sërish si një nga recetat më të porositura për stinën e verës.

4.Qofte korçe
Të njohura ndryshe si kërnacka korçe, ky gatim tipik nga qyteti i Korçës është aq i shijshëm saqë nuk do të mjaftoheni me një porosi. Pasi keni ngrënë një, do të kërkoni të dytën, të tretën e kështu me radhë.

5.Imam bajalldi
Është pjata verore më e shijshme. E njohur ndryshe si patëllxhanë të mbushur, kjo tavë ka një larmishmëri perimesh të gatuara bashkë dhe një aromë fantastike që s’do ta harroni lehtë.

6.Jufka
Nëse po mendon për një darkë të shijshme për 3 persona, porosit tavën me jufka dhe pulë. Është speciale për të gjithë ju adhuruesit e brumërave dhe pastave.

7.Trahana
Trahanaja është një recetë që përgatitet në verë, por konsumohet më shumë në dimër. Disa e përgatisin trahananë të ëmbël me qumësht e gjalpë, disa të tjerë me kos, disa me lëng domatesh e të tjerë me lëng mishi. Një gjë është e sigurt, sido që ta gatuash, asnjë nuk i thotë “jo”.