Gazetari Mustafa Nano thotë se gjesti i vajzës, e cila protestoi e zhveshur dy ditë më parë në sheshin “Skënderbej”, ka lënë një shije pozitive tek ai për faktin se ajo u tregoi njerëzve që është ajo që e ka në dorë trupin e saj. Në monologun e tij në nisje të emisionit “Arnautistan” Nano tha:

“Ajo nuk ka dashur që ngjarja të kishte këtë efekt anësor. Kjo është hera e parë që ndodh në vendin tonë, aty në sheshin”Skënderbej”.

Me gjestin e vet ajo ka dashur t’i thotë publikut se jam unë ajo që kam në dorë trupin tim, jam unë ajo që vendos se kur do të zhvishem lakuriq, apo kujt ti jepem.

Dhe askush nuk ka të drejtë të më prekë pa dëshirën time, apo të më ketë të vetën, ashtu si dhe unë apo shoqet e mia nuk kemi të drejtë të bëjmë tonin dikë pa dëshirën e tij.

Një trup femëror i zbuluar këtu tek ne merret si një ftesë që u bëhet gangove të rrugës të uritur seksualisht për t’u hedhur në sulm.

Gjesti i asaj vajze, shfaqja e saj mua më pëlqeu, më la një shije pozitive, këtë po ua thotë njeriu që nuk më ka munguar të jem kritik ndaj një lloj tipologjie të lakuriqësisë femërore që prodhon hiperseksualizimin.”