Gjithkush nga ne mund të ketë kërcitur gishtat apo kockat në pjesë të ndryshme të trupit. Shumë njerëz e lidhin këtë kërcitje me artritin. Studimet e mjekëve ortopedë bëjnë fjalë për një shifër mes 25 deri në 54 përqind të njerëzve në botë që kërcasin gishtat rregullisht. Meshkujt janë ata që kërcasin më shumë gjymtyrët e tyre se femrat. Por zhurmë në kërcitje, përveç gishtave, bëjnë edhe gjunjët, kyçet, qafën dhe pjesën e shpinës.

Por mjekët thonë se kërcitja e kockave nuk përfaqëson asnjë formë të inflamacionit apo artritit dhe nuk shkakton dëme të tyre apo gjymtyrëve. Sipas tyre, zhurma kërcitëse vjen nga lëvizja e tendinave ose muskujve në kocka apo nga plasja e bulëzave të nitrogjenit që formohen në hapësirat ndërlidhëse të gjymtyrëve. Shkencëtarët shpjegojnë se tendosja e muskujve dhe tendinave është një faktor kontribues për zhurmat kërcitëse të gjymtyrëve. Kjo shpjegon edhe kërcitjen që njeriu mund të dëgjojë në gjymtyrë sapo zgjohet nga krevati apo lëviz nga karrigia. Ndonjëherë, kërcitja e gjymtyrëve shoqërohet me dhimbje, pas dëmtimit të kërceve në mes të indeve dhe kockave që fërkohen me njëra tjetrën. Ekspertët rekomandojnë një vizitë tek mjeku në rast se zhurmat e kockave shoqërohen me dhimbje, vështirësi në lëvizje apo enjtje të ndryshme.

A shkakton artrit kërcitja e gishtave?

Gishtat janë ato që njeriu kërcet më shumë me vetëdije pavarësisht paralajmërimeve të nënave dhe gjysheve se kjo kërcitje do të shkaktojë dridhje të forta duarsh në pleqëri. Studimet kanë konfirmuar se kërcitja e gishtave nuk shkakton artrit në një periudhë të mëvonshme të jetës. Madje, sipas studimeve shanset e të prekurit nga artriti nuk ndikohen nga kërcitja e gishtave.

Por, ndonëse kërcitja e gjymtyrëve nuk shkakton apo nuk vjen nga artriti, sërish ajo përfaqëson një lloj rreziku për shëndetin. Në rastin e duarve, studimet kanë treguar se kërcitja kronike mund të shkaktojë inflamacion dhe dobësim të kockave dhe shtrëngimit të duarve.